27 ஜூலை 2026 : நவீன தொழில்நுட்பம், டிஜிட்டல் மயமாக்கல் மற்றும் செயற்கை நுண்ணறிவு (AI) ஆகிய துறைகளில் தஃவா நிறுவனங்கள் தேர்ச்சி பெற்று, காலத்தின் தேவைக்கு ஏற்ப செயல்பட வேண்டும் என்று மலேசிய பிரதமர் டத்தோ ஸ்ரீ அன்வார் இப்ராஹிம் வலியுறுத்தியுள்ளார்.
2026 சர்வதேச தஃவா மற்றும் வக்ஃப் மாநாட்டில் உரையாற்றிய அவர், தொழில்நுட்ப முன்னேற்றங்களைப் பயன்படுத்தி இஸ்லாமிய போதனைகளை மக்களிடம் சிறப்பாக கொண்டு செல்ல வேண்டியது அவசியம் என்றார். அதேவேளை, தொழில்நுட்ப வளர்ச்சியுடன் சேர்த்து அகீதா, நற்பண்புகள் மற்றும் மனிதநேய விழுமியங்களையும் பாதுகாப்பது முக்கியம் எனக் குறிப்பிட்டார்.
மாறிவரும் உலகச் சூழலுக்கு ஏற்ப தஃவா பணிகளும் புதுமையாக முன்னெடுக்கப்பட வேண்டும் என்றும், இளைஞர்கள் மற்றும் சமூகத்தின் அனைத்து தரப்பினரையும் சென்றடைய டிஜிட்டல் தளங்களை முழுமையாகப் பயன்படுத்த வேண்டும் என்றும் பிரதமர் தெரிவித்தார்.
இஸ்லாம் அமைதி, நீதி மற்றும் கருணையை வலியுறுத்தும் மார்க்கமாக உலகிற்கு எடுத்துரைக்க, அறிவார்ந்த மற்றும் உள்ளடக்கிய அணுகுமுறையை தஃவா நிறுவனங்கள் கடைப்பிடிக்க வேண்டும் என்றும் அன்வார் இப்ராஹிம் வலியுறுத்தினார்.
