05 ஜூலை 2026 : காங்கோ ஜனநாயகக் குடியரசில் பரவி வரும் எபோலா வைரஸ் பாதிப்பு தொடர்ந்து தீவிரமடைந்து வருகிறது. அந்நாட்டில் இதுவரை 1,502 பேருக்கு எபோலா தொற்று உறுதி செய்யப்பட்டுள்ள நிலையில், 473 பேர் உயிரிழந்துள்ளதாக அரசுத் தரப்பில் தெரிவிக்கப்பட்டுள்ளது.
இத்தொற்று நாட்டின் கிழக்குப் பகுதிகளான இதுரி, வடக்கு கிவு மற்றும் தெற்கு கிவு மாகாணங்களில் அதிகளவில் பதிவாகியுள்ளது. புதிய நோய்த்தொற்றுகளின் எண்ணிக்கை தொடர்ந்து அதிகரித்து வருவதால், நோய் பரவலைக் கட்டுப்படுத்த சுகாதாரத் துறையினர் தீவிர நடவடிக்கைகளை மேற்கொண்டு வருகின்றனர்.
எபோலாவுக்கு எதிரான புதிய சிகிச்சை முறைகளை மதிப்பீடு செய்வதற்கான மருத்துவப் பரிசோதனையும் தற்போது தொடங்கப்பட்டுள்ளது. உலக சுகாதார அமைப்பின் ஆதரவுடன் நடைபெறும் இந்த ஆய்வின் மூலம், புதிய மருந்துகளின் செயல்திறன் பரிசோதிக்கப்படவுள்ளது.
எனினும், ஆயுதக் குழுக்களின் வன்முறை, பொதுமக்களிடையே நிலவும் அவநம்பிக்கை மற்றும் சுகாதார வசதிகளின் பற்றாக்குறை ஆகியவை நோயைக் கட்டுப்படுத்தும் முயற்சிகளுக்கு பெரும் சவாலாக இருப்பதாக உலக சுகாதார அமைப்பு தெரிவித்துள்ளது.
