ஜோகூர், 05 ஜூலை 2026 : ஜோகூர் மாநிலம் மலேசியாவின் மிகவும் முன்னேறிய மற்றும் போட்டித்திறன் மிக்க மாநிலங்களில் ஒன்றாக உருவாகும் ஆற்றலைக் கொண்டுள்ளது என்றும், அதனை நனவாக்க மத்திய மற்றும் மாநில அரசுகளின் வலுவான ஒத்துழைப்பு அவசியம் என்றும் மனிதவள அமைச்சர் ரமணன் ராமகிருஷ்ணன் தெரிவித்தார்.
ஜோகூர் முன்னேற்றப் பயணத்தின் ஒரு பகுதியாக சிம்பாங் ரெங்கத்தில் நடைபெற்ற மக்கள் சந்திப்பில் கலந்து கொண்டு உரையாற்றிய அவர், தரமான முதலீடுகளை ஈர்ப்பது, அதிக ஊதியம் வழங்கும் வேலைவாய்ப்புகளை உருவாக்குவது மற்றும் வளர்ச்சித் திட்டங்களை விரைவுபடுத்துவது ஆகியவற்றில் மத்திய–மாநில அரசுகளின் இணக்கம் முக்கிய பங்கு வகிப்பதாகக் கூறினார்.
மதானி அரசாங்கம், ஜோகூர்–சிங்கப்பூர் சிறப்புப் பொருளாதார மண்டலத்தின் மேம்பாடு, தொழில்நுட்ப மற்றும் தொழிற்கல்வி பயிற்சியை வலுப்படுத்துதல், தொழில்முனைவோருக்கான ஆதரவு, சமூகப் பாதுகாப்புத் திட்டங்கள் உள்ளிட்ட பல்வேறு மக்கள் நலத் திட்டங்களை தொடர்ந்து செயல்படுத்தி வருவதாகவும் அவர் தெரிவித்தார்.
மேலும், வேலைவாய்ப்பு, அடிப்படை வசதிகள், இணைய இணைப்பு, பாதுகாப்பு மற்றும் உள்ளூர் வளர்ச்சி போன்ற மக்களின் அன்றாட வாழ்க்கையுடன் தொடர்புடைய பிரச்சினைகள் குறித்தும் கலந்துரையாடப்பட்டதாக அவர் கூறினார். எந்த சமூகமும் வளர்ச்சிப் பயணத்தில் பின்தங்காமல் இருப்பதை உறுதி செய்ய அரசு தொடர்ந்து நடவடிக்கை எடுக்கும் என்றும் அவர் வலியுறுத்தினார்.
