கோலாலம்பூர், 02 ஜூலை 2026 : நாடாளுமன்றப் பணிகள் மற்றும் ஜோகூர் மாநிலத் தேர்தல் பரபரப்புக்கு மத்தியில், “மனிதகுலத்தின் உலகளாவிய குரல்” (Universal Humanity’s Voice) என்ற கருப்பொருளில் நடைபெற்ற 2026ஆம் ஆண்டுக்கான ஆசியான்–சீனா–ரஷ்யா சர்வதேச கலைநயக் கவிதை ஒப்புவித்தல் போட்டியில் கலந்து கொள்ளும் வாய்ப்பு கிடைத்ததாக தொழில் முனைவோர் மேம்பாடு மற்றும் கூட்டுறவுத் துறையின் துணை அமைச்சர் யுனேஸ்வரன் ராமராஜ் தெரிவித்துள்ளார்.
இந்த நிகழ்வை சிறப்பாக ஏற்பாடு செய்த கோலாலம்பூர் வெஸ்லி மெத்தடிஸ்ட் அனைத்துலகப் பள்ளி, ஏற்பாட்டுக் குழுவினர் மற்றும் அனைத்து ஒத்துழைப்பு அமைப்புகளுக்கும் அவர் தனது மனமார்ந்த பாராட்டுகளையும் வாழ்த்துகளையும் தெரிவித்தார்.
மலேசியா, புரூணை, இந்தோனேசியா, தாய்லாந்து, சீனா மற்றும் ரஷ்யா ஆகிய நாடுகளைச் சேர்ந்த பள்ளிகள் இந்நிகழ்வில் பங்கேற்றமை பெருமைக்குரியதாகும் என்று அவர் குறிப்பிட்டார்.
பல்வேறு நாடுகளைச் சேர்ந்த இளம் தலைமுறையினர் மொழி மற்றும் கவிதையின் மூலம் ஒன்றிணைந்தது, கலை என்பது உறவுகளை வலுப்படுத்தும், பரஸ்பர புரிதலை வளர்க்கும் மற்றும் கலாச்சாரங்களையும் நாடுகளையும் இணைக்கும் சக்திவாய்ந்த பாலமாக விளங்குகிறது என்பதை நிரூபிப்பதாக அவர் கூறினார்.
மேலும், இதுபோன்ற அமைப்புகளின் முயற்சிகள், கவிதை என்பது வெறும் இலக்கிய மரபு மட்டுமல்லாமல், சமூகத்தை ஒன்றிணைக்கும், மனிதநேய விழுமியங்களை வளர்க்கும் மற்றும் இளம் தலைமுறையினரிடம் மொழி, இலக்கியத்தின் மீதான பற்றை ஏற்படுத்தும் சிறந்த ஊடகமாகவும் திகழ்கிறது என்றார்.
பன்முகத்தன்மையை மதிக்கும், மொழிகளை உயர்த்திப் பேணும் மற்றும் பிராந்திய, சர்வதேச அளவில் ஒற்றுமை உணர்வை வலுப்படுத்தும் தலைமுறையை உருவாக்கும் வகையில், இதுபோன்ற முயற்சிகள் தொடர்ந்து முன்னெடுக்கப்பட வேண்டும் என்றும் அமைச்சர் யுனேஸ்வரன் ராமராஜ் வலியுறுத்தினார்.
