ஜோகூர், 03 ஜூலை 2026 : புலோ கசாப் தொகுதிக்கான ஹரப்பான் கூட்டணியின் இரண்டாம் நிலை வேட்பாளர் ரோஸி ரசித்துடன் இணைந்து, அமைச்சர் யுனேஸ்வரன் ராமராஜ் செகாமட் நாடாளுமன்றத் தொகுதிக்குட்பட்ட கம்போங் பாயா லாங் பகுதியில் உள்ள ஜோஹரி மீ பண்டுங் கடையில் கிராம மக்களை நேரில் சந்தித்து கலந்துரையாடினார்.
அப்போது, கிராம இளைஞர்கள் மற்றும் செபக் தக்ராவ் சங்கத்தின் பிரதிநிதிகள் தங்களது விளையாட்டு மைதானத்தை மேம்படுத்த வேண்டும் என்ற கோரிக்கையை முன்வைத்தனர். இந்தக் கோரிக்கையை நேரில் கேட்டறிந்த அமைச்சர் யுனேஸ்வரன், கிராமப்புற விளையாட்டுகள் இளைஞர்களின் ஒழுக்கம், ஒற்றுமை மற்றும் சமூக நல்லிணக்கத்தை வளர்க்கும் முக்கிய தளமாக இருப்பதால், இத்தகைய கோரிக்கைகள் உரிய கவனத்துடன் பரிசீலிக்கப்படும் என்று தெரிவித்தார்.
சந்திப்பின்போது, உள்ளூர் கடைக்காரரும் கிராம மக்களும் துரியன் பழம் வழங்கி தங்களை அன்புடன் வரவேற்றதற்கு அமைச்சர் நன்றி தெரிவித்தார். கிராம மக்களின் எளிமை, அன்பு மற்றும் விருந்தோம்பலே கிராம சமூகத்தின் தனிச்சிறப்பு என்றும் அவர் குறிப்பிட்டார்.
மேலும், மக்கள் மத்தியில் செல்வது வெறும் சந்திப்பு நிகழ்வாக அல்லாமல், அவர்களின் தேவைகளையும் பிரச்சினைகளையும் நேரில் கேட்டு அறிந்து, இயன்ற உதவிகளை வழங்குவதற்கான முயற்சியாகும் என்றும் அவர் கூறினார்.
புலோ கசாப் தொகுதி, செகாமட் நாடாளுமன்றத் தொகுதிக்குள் இடம்பெறுவதால், அப்பகுதி மக்களின் குரல் தொடர்ந்து அரசின் கவனத்திற்குக் கொண்டு செல்லப்பட்டு, அவர்களின் நலன்கள் பாதுகாக்கப்படும் என்பது நாடாளுமன்ற உறுப்பினராக தனது பொறுப்பு என்றும் அமைச்சர் யுனேஸ்வரன் ராமராஜ் வலியுறுத்தினார். ஹரப்பான் கூட்டணியின் வேட்பாளர் ரோஸி ரசித்துடன் இணைந்து, மக்களுக்கு சேவை செய்வதிலும், அவர்களின் நலனுக்காக தொடர்ந்து உழைப்பதிலும் உறுதியாக இருப்பதாகவும் அவர் தெரிவித்தார்.
