செகாமட், 13 ஜூன் 2026 : “மதானி தலைமுறையின் அபிலாஷைகள்” என்ற கருப்பொருளில் நடைபெற்ற ஒய்பி யூனஸ் கோப்பை பேச்சுப் போட்டி, செகாமட் சென்ட்ரல் ஷாப்பிங் மாலில் வெற்றிகரமாக நிறைவடைந்தது.
செகாமட் மாவட்டக் கல்வி அலுவலகத்தின் ஒத்துழைப்புடன் நடைபெற்ற இப்போட்டியில், செகாமட் மாவட்டத்தைச் சேர்ந்த இடைநிலைப் பள்ளிகளின் படிவம் 1 முதல் படிவம் 6 வரையிலான மாணவர்களை பிரதிநிதித்துவப்படுத்தி 26 மாணவர்கள் பங்கேற்றனர்.
போட்டியாளர்களின் உரைகள் தேசிய ஒற்றுமை, மலேசியா மதானியின் விழுமியங்கள் மற்றும் நாட்டின் எதிர்கால வளர்ச்சி ஆகியவற்றை மையமாகக் கொண்டு அமைந்திருந்தன. இந்நிகழ்வில் கலந்து கொண்ட துணை அமைச்சர் யுனேஸ்வரன் ராமராஜ், செகாமட் மாணவர்களின் பேச்சாற்றல், தன்னம்பிக்கை மற்றும் தலைமைத்துவத் திறனைப் பாராட்டினார்.
“குறுகிய காலத் தயாரிப்பில் கூட மாணவர்கள் தெளிவான வாதங்கள், சிறந்த அறிவாற்றல் மற்றும் நம்பிக்கையுடன் தங்களது கருத்துகளை வெளிப்படுத்திய விதம் மிகவும் ஆச்சரியமளித்தது,” என்று அவர் தெரிவித்தார்.
போட்டியில் சிறந்து விளங்கிய ஐந்து மாணவர்களுக்கு ரொக்கப் பரிசு, கோப்பை மற்றும் சான்றிதழ்கள் வழங்கப்பட்டன. இதில், SMK டத்தோ பெண்டாரா டாலம் பள்ளியைச் சேர்ந்த நூருல் ஹெர்லிஷா தாஹா முதலிடம் பெற்று RM500 ரொக்கப் பரிசை வென்றார். போட்டியில் பங்கேற்ற 26 மாணவர்களுக்கும் பாராட்டுச் சின்னமாக தலா RM100 வழங்கப்படும் என யுனேஸ்வரன் அறிவித்தார்.
மேலும், மாணவர்களின் தலைமைத்துவத் திறன், தன்னம்பிக்கை மற்றும் தொடர்பாடல் ஆற்றலை மேம்படுத்தும் நோக்கில், போட்டியில் பங்கேற்ற அனைவருக்கும் முழு நிதியுதவியுடன் இரண்டு பகல் மற்றும் ஒரு இரவு கொண்ட தலைமைத்துவப் பயிலரங்கில் கலந்துகொள்ள வாய்ப்பு வழங்கப்படவுள்ளதாகவும் அவர் கூறினார்.
இப்போட்டி கல்வியாளர்கள், பெற்றோர்கள் மற்றும் மாணவர்களிடமிருந்து சிறந்த வரவேற்பைப் பெற்றுள்ளதாகக் குறிப்பிட்ட அவர், நீண்ட காலமாகத் திட்டமிடப்பட்ட இந்த முயற்சி வெற்றிகரமாக நடைமுறைப்படுத்தப்பட்டிருப்பதில் மகிழ்ச்சி தெரிவித்தார்.
நிகழ்ச்சியை வெற்றிகரமாக நடத்த ஒத்துழைப்பு வழங்கிய செகாமட் சென்ட்ரல் ஷாப்பிங் மால், செகாமட் மாவட்டக் கல்வி அலுவலகம், ஆசிரியர்கள், பெற்றோர்கள், மாணவர்கள் மற்றும் அனைத்து தரப்பினருக்கும் அவர் நன்றியைத் தெரிவித்தார்.
செகாமட் மாணவர்களின் கல்வி மற்றும் தலைமைத்துவ ஆற்றலை மேம்படுத்தும் தனது முயற்சிகள் தொடரும் என்றும், மக்களின் ஊக்கமளிக்கும் வரவேற்பைத் தொடர்ந்து இப்பேச்சுப் போட்டி எதிர்காலத்தில் மேலும் விரிவான அளவில் நடத்தப்படும் என்றும் யுனேஸ்வரன் ராமராஜ் தெரிவித்தார்.
