நெகிரி செம்பிலான், 22 செப்டம்பர் 2026 : ஜாலான் கோட்டாவில் டத்தோ கோவில் என அழைக்கப்படும் ஸ்ரீ அமிர்தலிங்கேஸ்வரர், ஸ்ரீ முனீஸ்வரர், ஸ்ரீ மகா சக்தி அம்மன் ஆலயத்தின் 34ஆம் ஆண்டு திருவிழா பக்தர்கள் மற்றும் பொதுமக்களின் திரளான பங்கேற்புடன் சிறப்பாக நடைபெற்றது.
திருவிழாவையொட்டி காலையிலேயே ஏராளமான பக்தர்கள் ஆலயத்திற்கு வருகை தந்து தங்களது நேர்த்திக்கடன்களை செலுத்தி சுவாமி தரிசனம் செய்தனர். தொடர்ந்து மதிய வேளையில் சிறப்பு பூஜைகள் நடைபெற்றதுடன், பக்தர்கள் பங்கேற்ற தீமிதி திருவிழாவும் சிறப்பாக நடைபெற்றது.
தீமிதி நிகழ்வைத் தொடர்ந்து பக்தர்கள் மற்றும் பொதுமக்களுக்கு அன்னதானம் வழங்கப்பட்டது. இதையடுத்து மாலை நேரத்தில் நடைபெற்ற ரத ஊர்வலம் விழாவின் முக்கிய நிகழ்வாக அமைந்தது. அலங்கரிக்கப்பட்ட ரதத்தில் சுவாமி எழுந்தருள, பக்தர்கள் பக்திப் பரவசத்துடன் கலந்து கொண்டு வழிபட்டனர்.
காலை முதல் மாலை வரை நடைபெற்ற பல்வேறு சிறப்பு வழிபாடுகள் மற்றும் நிகழ்வுகளால் ஆலய வளாகம் விழாக்கோலம் பூண்டது. பக்தர்கள் ஒன்றுகூடி வழிபாடுகளில் கலந்து கொண்ட நிலையில், ஆலயத்தின் 34ஆம் ஆண்டு திருவிழா சிறப்பாக நிறைவடைந்தது.
