சென்னை, 11 செப்டம்பர் 2026 : தமிழகத்திற்கு தொழில் முதலீடுகளை ஈர்க்கும் நோக்கில் முதல்-அமைச்சர் எஸ். ஜோசப் விஜய் நேற்று இரவு சுமார் 9 மணியளவில் சென்னையில் இருந்து இங்கிலாந்துக்கு புறப்பட்டுச் சென்றார். முதல்-அமைச்சர் விஜய், விமான நிலையத்தில் பயணிகள் பயன்படுத்தும் 2-வது நுழைவுவாயில் வழியாகச் சென்றார். விஐபிகள் பயன்படுத்தும் 6-வது நுழைவுவாயில் வழியாக அவர் செல்லவில்லை.
தமிழக அரசு வெளியிட்டுள்ள செய்திக்குறிப்பில், தமிழகத்தை ஆசியாவின் முன்னணி முதலீட்டுக்கு உகந்த மையமாக உருவாக்கும் நோக்கில் அரசு செயல்பட்டு வருவதாக தெரிவிக்கப்பட்டுள்ளது. விஜய் தலைமையிலான அரசு பொறுப்பேற்ற 100 நாட்களுக்குள் நடைபெற்ற தமிழ்நாடு முதலீட்டாளர்கள் மாநாடு மூலம் ரூ.1 லட்சம் கோடிக்கும் அதிகமான மதிப்பிலான புரிந்துணர்வு ஒப்பந்தங்கள் கையெழுத்தாகியுள்ளதாகவும் குறிப்பிடப்பட்டுள்ளது.
மேலும், பல்வேறு ஐரோப்பிய நாடுகளைச் சேர்ந்த பன்னாட்டு நிறுவனங்கள் தமிழகத்தில் சுமார் ரூ.8,491 கோடி மதிப்பிலான முதலீட்டுத் திட்டங்களை முன்மொழிந்துள்ளன. இதன் மூலம் சுமார் 5,690 பேருக்கு வேலைவாய்ப்பு கிடைக்கும் என எதிர்பார்க்கப்படுகிறது.
இந்தியா–இங்கிலாந்து விரிவான பொருளாதார மற்றும் வர்த்தக ஒப்பந்தம் (CETA) கடந்த ஜூலை 15ஆம் தேதி அமலுக்கு வந்துள்ள நிலையில், இங்கிலாந்து நிறுவனங்களுடனான முதலீட்டு உறவுகளை மேலும் வலுப்படுத்துவது விஜய்யின் பயணத்தின் முக்கிய நோக்கமாக உள்ளது. குறிப்பாக வாகனங்கள் மற்றும் மின்சார வாகனங்கள், மின்னணுவியல், மேம்பட்ட உற்பத்தி மற்றும் Global Competence Centres (GCC) உள்ளிட்ட துறைகளில் புதிய முதலீடுகளை ஈர்க்க திட்டமிடப்பட்டுள்ளது.
தமிழகத்தில் உலகத் தரம் வாய்ந்த ‘மோட்டார் ஸ்போர்ட்ஸ் சிட்டி’ அமைக்கப்படும் என சட்டப்பேரவையில் அறிவிக்கப்பட்டுள்ள நிலையில், அதற்கான சிறந்த நடைமுறைகளை அறிந்து கொள்வதற்காக உலகப் புகழ்பெற்ற ‘சில்வர்ஸ்டோன் மோட்டார் ரேசிங் சர்க்யூட்’ சென்று பார்வையிடவும் திட்டமிடப்பட்டுள்ளது. இதன் மூலம் மோட்டார் ஸ்போர்ட்ஸ் உள்கட்டமைப்பு, விளையாட்டு சுற்றுலா மற்றும் தொடர்புடைய வாகனத் தொழில்துறைகளுக்கான வாய்ப்புகளை ஆராய முடியும்.
இந்தப் பயணத்தில் பொதுப்பணித்துறை மற்றும் விளையாட்டு மேம்பாட்டுத்துறை அமைச்சர் ஆதவ் அர்ஜுனா, தமிழ்நாடு விளையாட்டு மேம்பாட்டு ஆணைய உறுப்பினர் செயலர் மேகநாத ரெட்டி, தொழில் வழிகாட்டி நிறுவனத்தின் நிர்வாக இயக்குநரும் தலைமைச் செயல் அதிகாரியுமான தீபக் ஜேக்கப் உள்ளிட்டோர் இடம்பெற்றுள்ளனர்.
