கோலாலம்பூர், 11 செப்டம்பர் 2026 : 2026ஆம் ஆண்டுக்கான தொழிலாளர் சங்கங்களின் தேசிய மாநாட்டைத் தொடங்கி வைத்த அமைச்சர் ரமணன் ராமகிருஷ்ணன், நாட்டின் தொழிலாளர் இயக்கம் மாறிவரும் வேலைச் சூழலுக்கு ஏற்ப மேலும் முன்னேற்றமானதாகவும், தொழில்முறையுடனும், ஆற்றல்மிக்கதாகவும் செயல்பட வேண்டும் என்று வலியுறுத்தினார்.
தொழில்நுட்பம், தானியக்கம் மற்றும் செயற்கை நுண்ணறிவு (AI) ஆகியவற்றின் வளர்ச்சியால் பணியிடங்களும், வேலை செய்யும் முறைகளும் வேகமாக மாறி வருவதாக அவர் குறிப்பிட்டார். இதற்கேற்ப தொழிற்சங்கங்களும் தங்களை நவீனப்படுத்திக் கொண்டு, புதிய வேலைச் சூழலில் தொழிலாளர்களின் உரிமைகள் மற்றும் நலன்களை திறம்பட பாதுகாக்க வேண்டும் என்றார்.
தொழிலாளர்கள் மற்றும் தொழிற்சங்கங்களுக்கு MADANI அரசாங்கம் தொடர்ந்து ஆதரவளிக்கும் என்றும், 2026ஆம் ஆண்டில் தொழிற்சங்கங்களின் திறன் மேம்பாடு, கல்வி, நிர்வாகம் மற்றும் டிஜிட்டல் மயமாக்கலை வலுப்படுத்த மொத்தம் RM3.5 மில்லியன் நிதி ஒதுக்கப்பட்டுள்ளதாகவும் ரமணன் ராமகிருஷ்ணன் தெரிவித்தார்.
அரசாங்கம், முதலாளிகள் மற்றும் தொழிலாளர்கள் ஒன்றிணைந்து கலந்துரையாடி, ஒருவரையொருவர் செவிமடுத்து, பிரச்சினைகளுக்குத் தீர்வு காணும்போதுதான் வலுவான தொழில்துறை உறவை உருவாக்க முடியும் என்றும் அவர் கூறினார்.
மேலும், சர்வதேச தொழிலாளர் மாநாட்டில் (ILC) பங்கேற்றதன் மூலம் மலேசியாவுக்கு கிடைத்துள்ள சாதகமான விளைவுகள் மற்றும் தாக்கங்கள் குறித்தும் தொழிற்சங்கத் தலைவர்களிடம் அவர் பகிர்ந்து கொண்டார். குறிப்பாக, நாட்டின் தொழிலாளர்களின் பாதுகாப்பு மற்றும் நலனை வலுப்படுத்துவதற்கான நடவடிக்கைகள் குறித்து சர்வதேச அரங்கில் பெற்ற அனுபவங்கள் முக்கியத்துவம் வாய்ந்தவை என அவர் குறிப்பிட்டார்.
சர்வதேச அரங்கில் மலேசியா முன்வைக்கும் கொள்கைகளும் முயற்சிகளும் இறுதியில் உள்நாட்டில் உள்ள தொழிலாளர்களுக்கு உண்மையான பலன்களாக மாற்றப்பட வேண்டும் என்றும் ரமணன் ராமகிருஷ்ணன் வலியுறுத்தினார்.
“வலுவான தொழிற்சங்கம், அதிக பாதுகாப்புள்ள தொழிலாளர்கள், வளமான நாடு” என்பதே தங்களின் இலக்கு என்றும், மலேசியாவின் தொழிலாளர் துறை நியாயமான, உற்பத்தித்திறன் மிக்க மற்றும் நிலையான முறையில் தொடர்ந்து வளர வேண்டும் என்றும் அவர் தெரிவித்தார்.
