சென்னை, 25 ஆகஸ்ட் 2026 : சென்னையின் இரண்டாவது விமான நிலையமாக அமைக்கத் திட்டமிடப்பட்டிருந்த பரந்தூர் பசுமை விமான நிலையத் திட்டத்தை கைவிட தமிழக அரசு எடுத்துள்ள முடிவுக்கு திமுக தலைவர் மு.க.ஸ்டாலின் கடும் எதிர்ப்பு தெரிவித்துள்ளார். இந்த முடிவு தமிழகத்தின் வளர்ச்சியை பல ஆண்டுகள் பின்னுக்குத் தள்ளும் என்றும், தமிழக நலன்களை சிறிய அரசியல் காரணங்களுக்காக அடகு வைக்க முடியாது என்றும் அவர் கூறியுள்ளார்.
சட்டப்பேரவையில் விதி 110-ன் கீழ் பரந்தூர் விமான நிலையத் திட்டம் கைவிடப்படுவதாக முதலமைச்சர் சி.ஜோசப் விஜய் அறிவித்தார். பரந்தூர் மற்றும் சுற்றுவட்டார கிராமங்களின் விவசாய நிலங்கள், விவசாயிகள் மற்றும் பொதுமக்களின் வாழ்வாதாரத்தைப் பாதுகாக்கும் நோக்கில் இந்த முடிவு எடுக்கப்பட்டதாக அவர் தெரிவித்தார். அதேவேளை, மாற்று இடத்தில் புதிய விமான நிலையம் அமைக்கவும், தற்போதைய சென்னை விமான நிலையத்தை விரிவுபடுத்தவும் நடவடிக்கை எடுக்கப்படும் என கூறினார்.
இதற்கு எதிர்ப்பு தெரிவித்த ஸ்டாலின், பரந்தூர் திட்டத்திற்கான பல்வேறு ஆய்வுகள், தயாரிப்புப் பணிகள் மற்றும் அனுமதி நடவடிக்கைகள் ஏற்கனவே மேற்கொள்ளப்பட்டுள்ளதாக சுட்டிக்காட்டினார். புதிய இடத்தைத் தேர்வு செய்து மீண்டும் பணிகளைத் தொடங்கினால் தமிழகத்தின் தொழில் மற்றும் பொருளாதார வளர்ச்சி பாதிக்கப்படும் என்றும் அவர் தெரிவித்தார்.
மேலும், தொழில் வளர்ச்சி மற்றும் முதலீடுகளை ஈர்க்க சென்னைக்கு உலகத் தரத்திலான புதிய விமான நிலையம் அவசியம் என்றும், திட்டத்தை கைவிடுவது போட்டி மாநிலங்களுக்கு சாதகமாக அமையும் என்றும் ஸ்டாலின் விமர்சித்தார்.
