சென்னை, 06 ஆகஸ்ட் 2026 : தமிழக சட்டப்பேரவையில் த.வெ.க. அரசின் முதல் வேளாண் பட்ஜெட் இன்று தாக்கல் செய்யப்பட்டது. வேளாண்மை அமைச்சர் ஆர். வினோத் தாக்கல் செய்த இந்த பட்ஜெட்டில், விவசாய உற்பத்தி அதிகரிப்பு, நீர்ப்பாசன வசதிகள் விரிவாக்கம், நவீன தொழில்நுட்ப பயன்பாடு மற்றும் விவசாயிகளின் வருமானத்தை உயர்த்தும் பல்வேறு திட்டங்கள் அறிவிக்கப்பட்டுள்ளன.
அடுத்த ஐந்து ஆண்டுகளில் உணவுத்தானிய உற்பத்தியை 131 லட்சம் மெட்ரிக் டன்னாக உயர்த்தவும், 2026–27ஆம் ஆண்டில் 125 லட்சம் மெட்ரிக் டன் இலக்கை எட்டவும் அரசு திட்டமிட்டுள்ளது. மேலும், செயற்கை நுண்ணறிவு (AI) அடிப்படையிலான விவசாயிகள் திட்டம், ‘வெற்றி விவசாயி’ விருது உள்ளிட்ட புதிய முயற்சிகளும் அறிவிக்கப்பட்டுள்ளன.
இந்நிலையில், விவசாயக் கடன் தள்ளுபடி, வறட்சி நிவாரணம் மற்றும் தரமான விதைகள் உள்ளிட்ட முக்கிய கோரிக்கைகள் நிறைவேற்றப்படுமா என்ற எதிர்பார்ப்பில் விவசாயிகள் இருந்ததாக கூறப்படுகிறது.
இதற்கிடையில், எதிர்க்கட்சித் தலைவர் மு.க. ஸ்டாலின், வறட்சியால் பாதிக்கப்பட்ட டெல்டா விவசாயிகளுக்கான நிவாரணம் மற்றும் குறுவை சாகுபடி பிரச்சினைகளுக்கு போதிய முக்கியத்துவம் வழங்கப்படவில்லை என குற்றம்சாட்டியுள்ளார்.
தொழில்நுட்பம் மற்றும் உற்பத்தி வளர்ச்சியை மையமாகக் கொண்ட இந்த முதல் வேளாண் பட்ஜெட், விவசாயிகளின் உடனடி தேவைகளையும் நீண்டகால வளர்ச்சியையும் எந்த அளவுக்கு பூர்த்தி செய்யும் என்பது குறித்து விவசாயிகள் மற்றும் அரசியல் வட்டாரங்கள் கவனித்து வருகின்றன.
