கிளாஸ்கோ, 03 ஆகஸ்ட் 2026 : 2026 காமன்வெல்த் விளையாட்டுப் போட்டியில் மலேசியாவுக்கு மேலும் ஒரு பதக்கம் கிடைத்துள்ளது. பாரா மகளிர் லான் பவுல்ஸ் B6–B8 இரட்டையர் பிரிவில் நோராசியன் டாவுத் மற்றும் ஜாரியா ஜகாரியா இணை வெண்கலப் பதக்கத்தை வென்று நாட்டிற்கு பெருமை சேர்த்தது.
கிளாஸ்கோவில் நடைபெற்ற வெண்கலப் பதக்கப் போட்டியில் மலேசிய ஜோடி சிறப்பான ஆட்டத்தை வெளிப்படுத்தி பதக்கத்தை கைப்பற்றியது. இந்த வெற்றியின் மூலம், 2026 காமன்வெல்த் விளையாட்டில் மலேசியாவின் பாரா லான் பவுல்ஸ் பிரிவில் குறிப்பிடத்தக்க சாதனை பதிவு செய்யப்பட்டுள்ளது.
முன்னதாக நடைபெற்ற அரையிறுதிப் போட்டியில், நோராசியன்–ஜாரியா ஜோடி நியூசிலாந்தின் ஜூலி ஓ’கொனல் மற்றும் டெரி பிளாக்பர்ன் இணையை எதிர்கொண்டது. கடுமையான போராட்டத்துக்குப் பிறகு மலேசிய ஜோடி இறுதிப்போட்டிக்கான வாய்ப்பை இழந்தாலும், பின்னர் வெண்கலப் பதக்கத்தை வென்று போட்டியை வெற்றிகரமாக நிறைவு செய்தது.
இந்தப் பதக்கம், கிளாஸ்கோ காமன்வெல்த் விளையாட்டில் மலேசியாவின் பதக்க எண்ணிக்கையை மேலும் அதிகரித்துள்ளது. லான் பவுல்ஸ் மற்றும் பாரா லான் பவுல்ஸ் பிரிவுகளில் மலேசிய வீரர்கள் தொடர்ந்து சிறப்பான செயல்திறனை வெளிப்படுத்தி வருவது குறிப்பிடத்தக்கது.
