பினாங்கு, 01 நவம்பர் 2026 : மலேசியாவின் பினாங்கு அறிவியல் பல்கலைக்கழகத்தில் (USM) நடைபெற்ற ‘கோட் ரெட் பினாங்கு’ (Code Red Penang) இளைஞர் விழிப்புணர்வு மற்றும் எழுச்சிப் பெருவிழா சிறப்பாக நிறைவடைந்தது.
மலேசிய இந்திய இளைஞர் மன்றத்தின் (MIYC) பினாங்கு மாநிலக் கிளை உள்ளிட்ட பல்வேறு அமைப்புகள் இணைந்து ஏற்பாடு செய்த இந்நிகழ்ச்சியில், இளைஞர்களின் தனித்திறன்களை வளர்த்தல், உடல்நலம், சட்டம் மற்றும் கல்வி தொடர்பான விழிப்புணர்வை ஏற்படுத்துதல் உள்ளிட்ட பல்வேறு அம்சங்கள் குறித்து சிறப்பு அமர்வுகள் இடம்பெற்றன.
இந்நிகழ்ச்சியில் தேசிய ஒருமைப்பாட்டுத் துறை துணை அமைச்சரும் செகாமாட் நாடாளுமன்ற உறுப்பினருமான மாண்புமிகு கோ. யுனேசுவரன் உள்ளிட்ட முக்கியப் பிரமுகர்கள் சிறப்பு விருந்தினர்களாகக் கலந்து கொண்டு நிகழ்ச்சியைச் சிறப்பித்தனர். இளைஞர்களின் ஆற்றல், திறமை மற்றும் சமூகப் பங்களிப்பை ஊக்குவிக்கும் நோக்கில் நடைபெற்ற இவ்விழா, இளைஞர்களுக்குப் பயனுள்ள விழிப்புணர்வை வழங்கும் நிகழ்வாக அமைந்தது.
