பினாங்கு, 25 ஜூலை 2026 : பினாங்கில் உள்ள PICCA மாநாட்டு மையத்தில் நடைபெற்ற MUKMIN அமைப்பின் நிகழ்ச்சியில் கலந்து கொண்ட மலேசிய பிரதமர் டத்தோ ஸ்ரீ அன்வார் இப்ராஹிம், இந்திய முஸ்லிம் சமூகத்தின் முன்னேற்றத்தை நோக்கமாகக் கொண்ட Indian Muslim Transformational Framework 2030 (IMTF2030) திட்டத்தை அதிகாரப்பூர்வமாக தொடங்கி வைத்தார். மேலும், Mukmin Future Leaders Scholarship (MFLS) கல்வி உதவித்திட்டத்தையும் அறிமுகப்படுத்தினார்.
இந்திய முஸ்லிம் சமூகத்தின் கண்ணியத்தையும், நாட்டிற்கான அவர்களின் பங்களிப்பையும் உயர்த்தும் நோக்கில் MUKMIN முன்னெடுத்துள்ள இந்த முயற்சியை பிரதமர் பாராட்டினார். இது மதானி அரசாங்கத்தின் மக்கள் பங்கேற்பு, பொறுப்புணர்வு மற்றும் சமூக முன்னேற்றம் என்ற கொள்கைக்கு ஏற்ப அமைந்துள்ளதாக அவர் குறிப்பிட்டார்.
இளைஞர்கள் செயற்கை நுண்ணறிவு, டிஜிட்டல் தொழில்நுட்பம், அறிவியல் மற்றும் புதிய கண்டுபிடிப்புகளில் திறமையை வளர்த்துக் கொள்ள வேண்டியது அவசியம் என்றும், அதே நேரத்தில் ஒழுக்கம், மனிதநேயம், கலாசாரம் மற்றும் நற்பண்புகளை அடிப்படையாகக் கொண்டு முன்னேற வேண்டும் என்றும் பிரதமர் வலியுறுத்தினார்.
மனித கண்ணியத்தை மதிப்பதே உண்மையான முன்னேற்றத்தின் அடிப்படை எனக் குறிப்பிட்ட அவர், ஒரு சமூகத்தின் நலனுக்காக போராடுவது மற்ற சமூகங்களின் உரிமைகளையோ கண்ணியத்தையோ பாதிக்கக் கூடாது என்றும், வெறுப்பை நிராகரித்து மனிதநேயத்தை உயர்த்திப் பிடிக்க வேண்டும் என்றும் கூறினார்.
இந்த நிகழ்வில், பொருளாதாரத்தில் பின்தங்கிய குடும்பங்களைச் சேர்ந்த மாணவர்கள் உயர்கல்வியைத் தொடரவும், புதிய துறைகளில் முன்னேறவும் உதவும் வகையில் MUKMIN அமைப்புக்கு உடனடியாக RM2 மில்லியன் நிதி ஒதுக்கீட்டை பிரதமர் அன்வார் அறிவித்தார். இந்த முயற்சி அறிவார்ந்த, மதிப்புமிக்க புதிய தலைமுறையை உருவாக்கி, இந்திய முஸ்லிம் சமூகத்தின் முன்னேற்றத்திற்கும் நாட்டின் வளர்ச்சிக்கும் துணைபுரியும் என்ற நம்பிக்கையையும் அவர் வெளிப்படுத்தினார்.
