23 ஜூலை 2026 : கடுமையான பொருளாதார நெருக்கடி மற்றும் அத்தியாவசிய பொருட்களின் பற்றாக்குறையால் பாதிக்கப்பட்டுள்ள கியூபா மக்களுக்கு உதவும் வகையில், சுமார் ரூ.965 கோடி (100 மில்லியன் அமெரிக்க டாலர்) மதிப்பிலான மனிதாபிமான உதவித் திட்டத்தை அமெரிக்கா அறிவித்துள்ளது.
இந்த உதவித் திட்டத்தின் முதல் கட்டமாக, அமெரிக்காவில் இருந்து உணவுப் பொருட்கள் மற்றும் சுகாதாரப் பொருட்கள் அடங்கிய நிவாரணப் பொதிகளை ஏற்றிச் சென்ற சிறப்பு விமானம் கியூபாவை சென்றடைந்தது. இந்த உதவிகள் கியூபா அரசின் வழியாக அல்லாமல், கத்தோலிக்க நிவாரண அமைப்புகள் மற்றும் உள்ளூர் தேவாலயங்கள் மூலம் நேரடியாக மக்களிடம் கொண்டு சேர்க்கப்படும் என்று அமெரிக்க வெளியுறவுத்துறை தெரிவித்துள்ளது.
அமெரிக்க வெளியுறவுத்துறை செயலாளர் மார்கோ ரூபியோ, இந்த நிதி உதவி கியூபா அரசுக்காக அல்ல, அந்நாட்டு மக்களுக்காக வழங்கப்படுவதாக வலியுறுத்தியுள்ளார். மனிதாபிமான உதவிகள் உரிய பயனாளிகளை சென்றடைவதை உறுதி செய்யும் வகையில் வெளிப்படையான விநியோக முறை பின்பற்றப்படுவதாகவும் அவர் கூறினார்.
மறுபுறம், அமெரிக்கா கியூபா மீது பொருளாதாரத் தடைகள் மற்றும் நிதி அழுத்தங்களை தொடர்ந்து கடைப்பிடித்து வரும் சூழலில், மனிதாபிமான உதவியை மட்டும் தனியாக வழங்குவது சர்வதேச கவனத்தை ஈர்த்துள்ளது. எரிபொருள் தட்டுப்பாடு, மின்வெட்டு, உணவுப் பற்றாக்குறை மற்றும் மருந்து தட்டுப்பாடு காரணமாக கியூபா மக்கள் கடந்த சில மாதங்களாக கடுமையான சவால்களை எதிர்கொண்டு வருகின்றனர்.
இந்த புதிய உதவித் திட்டம் கியூபாவின் தற்போதைய மனிதாபிமான நெருக்கடியை ஓரளவு தணிக்க உதவும் என எதிர்பார்க்கப்பட்டாலும், அந்நாட்டின் பொருளாதார சவால்களுக்கு நீண்டகால தீர்வு காண அரசியல் மற்றும் பொருளாதார பேச்சுவார்த்தைகளும் அவசியம் என நிபுணர்கள் கருத்து தெரிவித்துள்ளனர்.
