04 ஜூலை 2026 : ஐக்கிய நாடுகள் சபையின் பயங்கரவாதத்தை எதிர்கொள்ளும் 4ஆவது உயர்மட்ட மாநாட்டில் பங்கேற்றிருந்த மலேசிய உள்துறை அமைச்சின் (KDN) பாதுகாப்புப் பிரிவு துணை தலைமைச் செயலாளர் டத்தோ ஹாஜி அப்துல் ஹலிம் அப்துல் ரஹ்மான், நியூயோர்க்கில் உள்ள மலேசிய துணைத் தூதரகம் மற்றும் மலேசிய குடிநுழைவுத் துறையின் அலுவலகத்திற்கு மரியாதை நிமித்தமான சந்திப்பை மேற்கொண்டார்.
அவரை, ஐக்கிய நாடுகள் சபைக்கான மலேசிய நிரந்தரப் பிரதிநிதித்துவ அலுவலகத்தின் பொறுப்புத் தூதர் சோஃபியான் அக்மால் அப்துல் கரீம், நியூயோர்க்கிற்கான மலேசிய துணைத் தூதர் நோர்ஹலிலா அப்துல் ஜலில் மற்றும் மலேசிய குடிநுழைவுத் துறையின் நியூயோர்க் அட்டாசே டாக்டர் நோர்லிசா டோல்ஹான் ஆகியோர் வரவேற்றனர்.
இந்தச் சந்திப்பின்போது, உலகளாவிய பாதுகாப்பு விவகாரங்கள், வெளிநாடுகளில் வாழும் மலேசியர்களின் நலன் மற்றும் இருதரப்பு ஒத்துழைப்பை மேலும் வலுப்படுத்துவது தொடர்பாக கருத்துப் பரிமாற்றம் நடைபெற்றது.
அதனைத் தொடர்ந்து, டத்தோ அப்துல் ஹலிம், நியூயோர்க்கில் செயல்பட்டு வரும் மலேசிய குடிநுழைவுத் துறையின் அலுவலகத்தை நேரில் பார்வையிட்டு, அங்குள்ள நிர்வாக நடவடிக்கைகள், வசதிகள் மற்றும் சேவை வழங்கல் முறைகளை ஆய்வு செய்தார். மேலும், அங்கு பணியாற்றும் அதிகாரிகளையும் சந்தித்து அவர்களுடன் கலந்துரையாடினார்.
வெளிநாடுகளில் பணியாற்றும் அரசுப் பணியாளர்களின் நலனில் சிறப்பு கவனம் செலுத்த வேண்டியதன் அவசியத்தை அவர் வலியுறுத்தினார். இதன் மூலம் குடிநுழைவு மற்றும் பாதுகாப்புச் சேவைகள் திறம்பட வழங்கப்படுவதோடு, சர்வதேச அரங்கில் மலேசியாவின் நற்பெயரும் இறையாண்மையும் தொடர்ந்து பாதுகாக்கப்படும் என்றும் அவர் தெரிவித்தார்.
