தாப்பா, 18 ஆகஸ்ட் 2026 : தாப்பா நாடாளுமன்றத் தொகுதியில் உள்ள அரசுப் பல்கலைக்கழகங்கள் (IPTA) மற்றும் தனியார் பல்கலைக்கழகங்களில் (IPTS) பயிலும் B40 பிரிவைச் சேர்ந்த மாணவர்களுக்கு கணினிகள் வழங்கும் திட்டம் தொடர்ந்து முன்னெடுக்கப்பட்டு வருகிறது.
வறுமை என்பது வெற்றிக்குத் தடையல்ல என்றும், குடும்பத்தின் வாழ்க்கை நிலையை மாற்றுவதற்காக தொடர்ந்து போராடுவதற்கான உத்வேகமாக அது அமைய வேண்டும் என்றும் தாப்பா நாடாளுமன்ற உறுப்பினர் டத்தோஸ்ரீ எம். சரவணன் தெரிவித்தார்.
தாம் தாப்பா நாடாளுமன்ற உறுப்பினராகப் பொறுப்பேற்ற காலத்திலிருந்து இதுவரை சுமார் 1,000 மாணவர்களுக்கு கணினிகள் வழங்கப்பட்டுள்ளதாக அவர் தெரிவித்தார். இந்தக் கணினிகள் மாணவர்கள் தங்களது உயர்கல்வியைத் தொடர்வதற்கும், கல்வி தொடர்பான பணிகளை மேற்கொள்வதற்கும் உதவியாக இருக்கும் என அவர் குறிப்பிட்டார்.
“வறுமை என்பது வெற்றிக்குத் தடையல்ல; அது நமது குடும்பங்களின் வாழ்க்கை நிலையை மாற்றுவதற்காக தொடர்ந்து போராடுவதற்கான உத்வேகம்,” என டத்தோஸ்ரீ எம். சரவணன் தெரிவித்தார்.
B40 குடும்பங்களைச் சேர்ந்த மாணவர்களின் கல்வி முன்னேற்றத்துக்கு ஆதரவளிக்கும் வகையில், கணினி வழங்கும் இத்திட்டம் தொடர்ந்து செயல்படுத்தப்படும் என எதிர்பார்க்கப்படுகிறது.
