ஜோகூர், 27 ஜூன் 2026 : தேசிய ஒற்றுமைத் துணை அமைச்சர் யுனேஸ்வரன் ராமராஜ், ஜோகூரின் செகாமட்டில் அமைந்துள்ள வூ லின் டியான் கோவிலில் நடைபெற்ற வூ லின் டியான் விசுவாசிகள் ஆதரவாளர்கள் அமைப்பின் ஆண்டுவிழாவில் கலந்து கொண்டார்.
இந்த நிகழ்வில் சமூகத் தலைவர்கள், அமைப்பின் நிர்வாகிகள் மற்றும் உள்ளூர் மக்களுடன் இணைந்து கலந்துகொண்ட அவர், இதுபோன்ற விழாக்கள் வெறும் ஆண்டுவிழாக்கள் மட்டுமல்லாமல், பல்வேறு இன, மத மற்றும் கலாசாரங்களைச் சேர்ந்த மக்களிடையே பரஸ்பர மரியாதை, புரிந்துணர்வு மற்றும் நல்லிணக்கத்தை வலுப்படுத்தும் முக்கிய நிகழ்வுகளாக விளங்குகின்றன என்றார்.
மேலும், செகாமட் பகுதியில் சுமார் RM600 மில்லியன் மதிப்பில் செயல்படுத்தப்பட்டு வரும் வெள்ளத் தடுப்புத் திட்டம் மற்றும் விரைவில் மீண்டும் செயல்பாட்டுக்கு வரவுள்ள செகாமட் உள்நாட்டுத் துறைமுகம் ஆகியவை, மக்களின் நலனை மையமாகக் கொண்டு அரசாங்கம் முன்னெடுத்து வரும் வளர்ச்சித் திட்டங்களுக்கு எடுத்துக்காட்டாக இருப்பதாக அவர் குறிப்பிட்டார்.
இந்த நிகழ்வின்போது, வூ லின் டியான் கோவிலின் வசதிகளை மேம்படுத்தவும், அங்கு நடைபெறும் சமூக மற்றும் கலாசார நடவடிக்கைகள் சிறப்பாக நடைபெறவும் RM30,000 நிதி ஒதுக்கீடு செய்யப்படுவதாக யுனேஸ்வரன் ராமராஜ் அறிவித்தார்.
வழிபாட்டுத் தலங்கள் அனைத்து சமூகத்தினரையும் ஒன்றிணைத்து நல்லெண்ணத்தையும் ஒற்றுமையையும் வலுப்படுத்தும் மையங்களாக தொடர்ந்து திகழ வேண்டும் என்றும், ஒற்றுமை என்பது வெறும் கோஷமாக இல்லாமல், அன்றாட வாழ்க்கையில் அனைவரும் இணைந்து உருவாக்க வேண்டிய பண்பாகும் என்றும் அவர் வலியுறுத்தினார்.
