சரவாக், 22 ஜூன் 2026 : பிந்துலு துறைமுகத்தின் நிர்வாகப் பொறுப்பு மத்திய அரசிடமிருந்து சரவாக் மாநில அரசிடம் அதிகாரப்பூர்வமாக ஒப்படைக்கப்பட்டுள்ளதாக பிரதமர் டத்தோ ஸ்ரீ அன்வர் இப்ராஹிம் தெரிவித்துள்ளார். இந்த நடவடிக்கை, 1963 மலேசிய ஒப்பந்தத்தின் (MA63) நோக்கங்களை நடைமுறைப்படுத்துவதில் மத்திய மற்றும் சரவாக் அரசுகளுக்கு இடையிலான ஒத்துழைப்பின் முக்கிய மைல்கல்லாகக் கருதப்படுகிறது.
இந்த ஒப்படைப்பு நிர்வாக மாற்றம் மட்டுமல்லாமல், நீதி, சமத்துவம் மற்றும் பகிரப்பட்ட செழிப்பு என்ற மதானி அரசாங்கத்தின் கொள்கையை பிரதிபலிக்கும் நடவடிக்கையாகவும் பிரதமர் குறிப்பிட்டார்.
மலேசியாவின் முக்கிய துறைமுகங்களில் ஒன்றான பிந்துலு துறைமுகம், நாட்டின் திரவ இயற்கை எரிவாயு (LNG) ஏற்றுமதிக்கான முக்கிய நுழைவாயிலாகவும், கிழக்கு மலேசியாவின் மிகப்பெரிய கொள்கலன் துறைமுகமாகவும் விளங்குகிறது. இந்த புதிய அந்தஸ்தின் மூலம், ஹைட்ரஜன் உள்ளிட்ட பசுமை எரிசக்தித் துறைகளின் வளர்ச்சிக்கு ஆதரவளிக்கும் உலகத் தரத்திலான பசுமை துறைமுகமாக இது உருவாகும் என எதிர்பார்க்கப்படுகிறது.
மேலும், இந்த ஒப்படைப்பு சரவாக்கின் பொருளாதார வளர்ச்சியை வலுப்படுத்துவதுடன், கடல்சார் துறையின் மேம்பாடு, புதிய முதலீடுகள், வேலைவாய்ப்புகள் மற்றும் எதிர்கால சந்ததியினருக்கான நீடித்த பொருளாதார வாய்ப்புகளை உருவாக்கும் என்றும் பிரதமர் தெரிவித்தார்.
மக்களின் நலனையும் நாட்டின் பகிரப்பட்ட வளர்ச்சியையும் உறுதிப்படுத்தும் வகையில், மத்திய அரசும் சரவாக் மாநில அரசும் தொடர்ந்து இணைந்து செயல்படும் என்றும் அவர் வலியுறுத்தினார்.
