கோலாலம்பூர், 06 ஜூன் 2026 : ஐக்கிய நாடுகள் சபையின் குற்றத் தடுப்பு மற்றும் குற்றவியல் நீதி ஆணையத்தின் (CCPCJ) 35வது அமர்வு ஆஸ்திரியாவின் வியன்னாவில் நடைபெற்ற நிலையில், எல்லைத் தாண்டிய குற்றங்கள், ஊழல் மற்றும் இணையக் குற்றங்களை எதிர்த்து சர்வதேச ஒத்துழைப்பின் மூலம் தொடர்ந்து போராடுவதற்கான தனது உறுதிப்பாட்டை மலேசியா மீண்டும் வலியுறுத்தியுள்ளது.
இந்த மாநாட்டில் மலேசியக் குழுவை மலேசிய அரச காவல்துறையின் குற்றப் புலனாய்வுத் துறை இயக்குநர் சிபி டத்தோ எம். குமார் தலைமையேற்று வழிநடத்தினார். உலகின் பல்வேறு நாடுகளைச் சேர்ந்த 150-க்கும் மேற்பட்ட பிரதிநிதிகள் கலந்து கொண்ட இந்த அமர்வில், குற்றத் தடுப்பு மற்றும் குற்றவியல் நீதி அமைப்புகளை வலுப்படுத்துவது குறித்து விரிவான கலந்துரையாடல்கள் இடம்பெற்றன.
முக்கிய விவாதத்தின் போது பேசிய டத்தோ எம். குமார், சிக்கலான சர்வதேச குற்றங்களை எதிர்கொள்வதில் நாடுகளுக்கிடையேயான ஒத்துழைப்பு மிகவும் அவசியம் எனக் குறிப்பிட்டார். மேலும், சர்வதேச சட்டங்களுக்கு இணங்க செயல்படுவதன் முக்கியத்துவத்தையும், சர்வதேச மனிதாபிமானச் சட்டங்களை மீறுவோர் பொறுப்பேற்க வேண்டிய அவசியத்தையும் வலியுறுத்தினார்.
மாநாட்டின் இரண்டாம் நாளில் மலேசியா வெளியிட்ட தேசிய அறிக்கையில், எல்லைத் தாண்டிய ஒழுங்கமைக்கப்பட்ட குற்றங்கள் மற்றும் ஊழலை எதிர்கொள்ள சட்ட அமைப்புகளை வலுப்படுத்துதல், நல்லாட்சியை மேம்படுத்துதல் மற்றும் பிற நாடுகளுடன் இணைந்து செயல்படுதல் ஆகியவை முக்கியமாக எடுத்துரைக்கப்பட்டன.
மேலும், எல்லைத் தாண்டிய ஒழுங்கமைக்கப்பட்ட குற்றங்களுக்கு எதிரான ஐ.நா. ஒப்பந்தம் (UNTOC) மற்றும் ஊழலுக்கு எதிரான ஐ.நா. ஒப்பந்தம் (UNCAC) ஆகியவற்றை நடைமுறைப்படுத்திய அனுபவங்களையும் மலேசியா பகிர்ந்துகொண்டது.
மாநாட்டிற்கு வெளியே, டத்தோ எம். குமார் ஐக்கிய அரபு அமீரக (UAE) பிரதிநிதிகளுடன் இருதரப்பு சந்திப்பில் ஈடுபட்டு, உளவுத்தகவல் பகிர்வு, பயிற்சி, திறன் மேம்பாடு மற்றும் சட்ட அமலாக்க ஒத்துழைப்பு தொடர்பாக ஆலோசனை நடத்தினார்.
CCPCJ-யின் 35வது அமர்வில் மலேசியாவின் பங்கேற்பு, உலகளாவிய மற்றும் எல்லைத் தாண்டிய குற்ற அச்சுறுத்தல்களை எதிர்கொள்வதில் நாட்டின் பாதுகாப்பு, நீதி மற்றும் சர்வதேச ஒத்துழைப்பை மேலும் வலுப்படுத்தும் உறுதியை வெளிப்படுத்துவதாக அமைந்துள்ளது.
