பினாங்கு, 05 ஜூன் 2026 : பினாங்கு தமிழ் எழுத்தாளர் சங்கம் ஏற்பாடு செய்திருந்த பாவேந்தர் பாரதிதாசன் நினைவு விழாவில் தாப்பா நாடாளுமன்ற உறுப்பினரும், ம.இ.கா. தேசிய துணைத் தலைவருமான டத்தோ ஸ்ரீ டாக்டர் எம். சரவணன் தலைமை ஏற்று நிகழ்ச்சியைத் தொடங்கி வைத்து சிறப்புரையாற்றினார்.
நிகழ்ச்சியில் உரையாற்றிய அவர், “தமிழுக்கும் அமுதென்று பேர்! அந்தத் தமிழ் இன்பத் தமிழ் எங்கள் உயிருக்கு நேர்” என்ற பாவேந்தர் பாரதிதாசனின் வரிகளை மேற்கோள் காட்டி, மொழி என்பது வெறும் தகவல் தொடர்பு சாதனம் அல்ல; அது ஒரு இனத்தின் அடையாளமும் உயிர்மூச்சுமாகும் என்றார்.
தொன்மை வாய்ந்த தமிழ் மொழியைப் பாதுகாத்து, அதன் பெருமையையும் பாரம்பரியத்தையும் அடுத்த தலைமுறைக்கு எடுத்துச் செல்வது ஒவ்வொரு தமிழரின் கடமையாகும் என்ற உணர்வை மக்களிடையே விதைத்த பெரும் இலக்கிய ஆளுமையாக பாரதிதாசன் திகழ்ந்தார் என்றும் அவர் குறிப்பிட்டார்.
மேலும், பாரதிதாசனின் சிந்தனைகளில் பெண்கள் கல்வி மற்றும் பெண் விடுதலைக்கு அளிக்கப்பட்ட முக்கியத்துவத்தை சுட்டிக்காட்டிய டத்தோ ஸ்ரீ டாக்டர் எம். சரவணன், “கல்வி இல்லாத பெண்கள் களர்நிலம்; அந்நிலத்தில் புல் விளைந்திடலாம், நல்ல புதல்வர்கள் விளைதல் இல்லை” என்ற கவிஞரின் வரிகள் இன்றளவும் சமூகத்திற்கு வழிகாட்டியாக உள்ளதாகத் தெரிவித்தார்.
ஒரு பெண்ணுக்கு கல்வி கற்பிப்பது என்பது ஒரு குடும்பத்தை மட்டுமல்ல, ஒரு தலைமுறையையே அறிவுப் பாதைக்கு அழைத்துச் செல்வதற்கு ஒப்பானது என்றும், பெண்களின் கல்வி மற்றும் சம உரிமை நாட்டின் முன்னேற்றத்திற்கு இன்றியமையாதவை என்றும் அவர் வலியுறுத்தினார்.
பாரதிதாசனின் கவிதைகள் வெறும் இலக்கியப் படைப்புகள் அல்ல; சமூகத்தில் நிலவும் மூடநம்பிக்கைகள், சமத்துவமின்மை மற்றும் அநீதிகளை எதிர்த்து மக்களை விழிப்புணர்வுடன் எழுப்பிய புரட்சிக் குரல்களாக அவை அமைந்துள்ளன என்றும் அவர் கூறினார்.
பினாங்கு மண்ணில் தமிழ் இலக்கியத்தையும், பாவேந்தரின் சமூக சீர்திருத்தக் கருத்துகளையும் இளம் தலைமுறையினரிடம் கொண்டு சேர்க்கும் இத்தகைய நிகழ்ச்சிகளை ஏற்பாடு செய்து வரும் பினாங்கு தமிழ் எழுத்தாளர் சங்கத்தின் முயற்சியை அவர் பாராட்டினார்.
தமிழ் மொழி, இலக்கியம் மற்றும் சமூக விழிப்புணர்வு ஆகியவற்றை வளர்க்கும் இத்தகைய பணிகள் தொடர வேண்டும் என்றும், பாவேந்தரின் சிந்தனைகள் எதிர்கால தலைமுறைகளுக்கும் வழிகாட்டியாக அமைய வேண்டும் என்றும் டத்தோ ஸ்ரீ டாக்டர் எம். சரவணன் தனது உரையில் வலியுறுத்தினார்.
