புத்ரஜெயா, 07 மே 2026 : உலகளாவிய கச்சா எண்ணெய் சந்தையில் நிலவி வரும் அசாதாரண சூழ்நிலையின் காரணமாக, மலேசியாவில் டீசல் சில்லறை விலை மீண்டும் உயர்த்தப்பட்டுள்ளது.
நிதி அமைச்சகம் வெளியிட்ட அறிக்கையின்படி, மே 7 முதல் 13 வரை அமலுக்கு வரும் புதிய எரிபொருள் விலைகளின் அடிப்படையில், தீபகற்ப மலேசியாவில் டீசல் விலை லிட்டருக்கு 5 சென் அதிகரித்து RM5.17 ஆக நிர்ணயிக்கப்பட்டுள்ளது. கடந்த வாரம் இது RM5.12 ஆக இருந்தது.
இதற்கிடையில், RON97 பெட்ரோல் விலை லிட்டருக்கு RM4.90 ஆக மாற்றமின்றி தொடர்கிறது. RON95 பெட்ரோல் விலை 5 சென் உயர்ந்து RM4.02 ஆக நிர்ணயிக்கப்பட்டுள்ளது.
மேற்காசிய மோதல்கள் மற்றும் உலகளாவிய கச்சா எண்ணெய் விநியோகத்தில் ஏற்பட்டுள்ள தடைகள் காரணமாக, சர்வதேச சந்தையில் பெட்ரோலிய பொருட்களின் விலை தொடர்ந்து அதிகரித்து வருவதாக அமைச்சகம் தெரிவித்துள்ளது.
இருப்பினும், மக்களின் வாழ்க்கைச் செலவைக் கட்டுப்படுத்தும் நோக்கில், மானிய எரிபொருள் விலைகளை அரசாங்கம் தொடர்ந்து நிலைநிறுத்தி வருவதாகவும் கூறப்பட்டுள்ளது.
அதன்படி, RON95 (BUDI95) லிட்டருக்கு RM1.99 ஆகவும், சபா, சரவாக் மற்றும் லபுவானில் டீசல் விலை லிட்டருக்கு RM2.15 ஆகவும் தொடர்கிறது. மேலும், மானிய பெட்ரோல் கட்டுப்பாட்டு அமைப்பு (SKPS) கீழ் RM2.05 மற்றும் மானிய டீசல் கட்டுப்பாட்டு அமைப்பு (SKDS) கீழ் RM2.15 என்ற விலையும் தொடரும்.
உலக சந்தை நிலைமை இன்னும் உறுதியற்றதாக உள்ளபோதிலும், மக்களின் நலனையும் அரசின் செலவுக் கட்டுப்பாட்டையும் சமநிலைப்படுத்தும் வகையில் எச்சரிக்கையுடன் அணுகப்படும் என அரசாங்கம் தெரிவித்துள்ளது.
