புத்ரஜெயா, 07 மே 2026 : 2025 ஆம் ஆண்டிற்கான தேசிய விளையாட்டு விருதுகள் (ASN) தொடர்பான தேர்வுக் குழு கூட்டம், இளைஞர் மற்றும் விளையாட்டு அமைச்சகத்தில் இன்று நடைபெற்றது. இந்தக் கூட்டத்திற்கு, அமைச்சகத்தின் பொதுச் செயலாளர் டத்தோ ரஹிமி இஸ்மாயில் தலைமை தாங்கினார்.
இந்தக் கூட்டத்தில், 2025 ஆம் ஆண்டு முழுவதும் நாட்டின் விளையாட்டு துறையில் சிறப்பாகச் செயல்பட்ட விளையாட்டு வீரர்கள், பயிற்சியாளர்கள், அதிகாரிகள் மற்றும் விளையாட்டு அமைப்புகளின் சாதனைகள் ஆய்வு செய்யப்பட்டன. தேசிய மற்றும் சர்வதேச மட்டங்களில் மலேசியாவிற்கு பெருமை சேர்த்தவர்களை கௌரவிக்கும் நோக்கில் இந்தத் தேர்வு செயல்முறை மேற்கொள்ளப்படுவதாக தெரிவிக்கப்பட்டது.
இந்த ஆண்டுக்கான ASN விருதுகள் மொத்தம் 11 பிரிவுகளில் வழங்கப்பட உள்ளன. அவற்றில் தேசிய விளையாட்டு வீரர் மற்றும் வீராங்கனை, தேசிய பாராலிம்பிக் வீரர் மற்றும் வீராங்கனை, தேசிய ஆண்கள் மற்றும் பெண்கள் அணிகள், தேசிய ஆண்கள் மற்றும் பெண்கள் பயிற்சியாளர்கள், சிறப்பு விருதுகள், விளையாட்டுத் தலைமைத்துவ விருதுகள் மற்றும் விளையாட்டு ஆளுமை விருதுகள் உள்ளிட்ட பிரிவுகள் இடம்பெறுகின்றன.
விளையாட்டு துறையில் தொடர்ந்து அர்ப்பணிப்புடன் சேவை செய்து வரும் நபர்கள் மற்றும் அமைப்புகளை கௌரவிக்கும் முக்கிய மேடையாக தேசிய விளையாட்டு விருதுகள் விளங்குகின்றன என்பது குறிப்பிடத்தக்கது.
