புதுடெல்லி, 26 ஏப்ரல் 2026 : வட இந்திய மாநிலங்களில் கடும் வெப்ப அலை தீவிரமடைந்துள்ள நிலையில், மாணவர்களின் பாதுகாப்பைக் கருத்தில் கொண்டு பல மாநிலங்களில் பள்ளி செயல்பாட்டு நேரங்களில் மாற்றம் செய்யப்பட்டுள்ளது. சில பகுதிகளில் காலை நேர வகுப்புகள் மட்டும் நடத்த உத்தரவிடப்பட்டுள்ளதுடன், சில மாநிலங்களில் கோடை விடுமுறையும் முன்கூட்டியே அறிவிக்கப்பட்டுள்ளது.
உத்தரப் பிரதேசம், மத்தியப் பிரதேசம், ராஜஸ்தான் உள்ளிட்ட பல மாநிலங்களில் வெப்பநிலை 44 டிகிரி செல்சியஸை தாண்டியுள்ளதால், பள்ளிகள் அதிகாலை முதல் நண்பகல் வரை மட்டுமே இயங்க அறிவுறுத்தப்பட்டுள்ளது. மாணவர்கள் வெயிலின் தாக்கத்திலிருந்து பாதுகாக்கும் நோக்கில் இந்த நடவடிக்கை எடுக்கப்பட்டுள்ளதாக அதிகாரிகள் தெரிவித்துள்ளனர்.
ஒடிசா உள்ளிட்ட சில மாநிலங்களில் வெப்ப அலை தீவிரம் காரணமாக பள்ளிகளுக்கு முன்கூட்டியே கோடை விடுமுறை அறிவிக்கப்பட்டுள்ளது. மேலும், குடிநீர் இடைவேளை, திறந்தவெளி செயல்பாடுகள் தவிர்ப்பு போன்ற முன்னெச்சரிக்கை நடவடிக்கைகளும் பள்ளிகளில் அமல்படுத்தப்பட்டுள்ளன.
வெப்ப அலை தொடரும் என வானிலை மையம் எச்சரித்துள்ளதால், மாணவர்கள் மற்றும் பெற்றோர்கள் அவசியமின்றி வெளியில் செல்ல வேண்டாம் என்றும் அறிவுறுத்தப்பட்டுள்ளது.
