சூடான்,14 ஏப்ரல் 2026 : போர் தாக்கம் கடுமையாக இருக்கும் Sudan நாட்டில், கோடிக்கணக்கான மக்கள் தினமும் ஒரு வேளை உணவுடன் வாழ்ந்து வருகின்றனர் என பல தன்னார்வ அமைப்புகள் எச்சரிக்கை வெளியிட்டுள்ளன.
இந்த நெருக்கடி, 2023 முதல் நடைபெற்று வரும் உள்நாட்டு போரின் விளைவாக உருவானதாகக் கூறப்படுகிறது. இந்த மோதல் விவசாயம், சந்தைகள் மற்றும் உணவுப் பொருள் விநியோகத்தை கடுமையாக பாதித்ததால், பெரும்பான்மையான மக்கள் உணவுக் குறைபாட்டில் சிக்கியுள்ளனர்.
வட டார்ஃபூர் மற்றும் தெற்கு கோர்டோஃபான் போன்ற பகுதிகளில், பல குடும்பங்கள் தினமும் ஒரு முறை மட்டுமே உணவருந்த முடியும் நிலையில் உள்ளதாக அறிக்கை கூறுகிறது. சிலர் பல நாட்கள் உணவே இல்லாமல் தவிக்கும் நிலையும் ஏற்பட்டுள்ளதாகவும் தெரிவிக்கப்பட்டுள்ளது.உணவு பற்றாக்குறையால், சிலர் இலைகள் மற்றும் கால்நடை உணவுகளை கூட உண்ணும் நிலைக்கு தள்ளப்பட்டுள்ளனர். மேலும், சமூக சமையலறைகள் கூட தேவையை பூர்த்தி செய்ய முடியாத நிலை உருவாகியுள்ளது.
2026 கணக்கெடுப்பின் படி, நாட்டின் மக்கள்தொகையில் சுமார் 61.7% பேர் (28.9 மில்லியன் மக்கள்) தீவிர உணவுக் குறைபாட்டை எதிர்கொண்டு வருகின்றனர்.இந்த நிலை, உலகின் மிகப்பெரிய மனிதாபிமான நெருக்கடிகளில் ஒன்றாக மாறியுள்ளதாக ஐ.நா. மற்றும் உதவி அமைப்புகள் எச்சரித்துள்ளன.
