கோலாலம்பூர், 31 மார்ச் 2026 : வலுவான பொருளாதார அடிப்படைகள் மற்றும் நடைபெற்று வரும் சீர்திருத்தங்கள் உள்ளிட்ட உள்நாட்டு மற்றும் வெளிநாட்டுக் காரணிகளால், 2026-ஆம் ஆண்டிலும் ரிங்கிட்டின் நேர்மறையான செயல்பாடு தொடரும் என கணிக்கப்பட்டுள்ளது. உள்ளூர் நாணயத்தின் நகர்வு, சந்தை நிலவரங்கள் மற்றும் உலகளாவிய நிகழ்வுகளைப் பொறுத்தே தொடர்ந்து அமையும் என்று மலேசிய மத்திய வங்கியின் (பிஎன்எம்) ஆளுநர் டத்தோ செரி அப்துல் ரஷீத் கஃபூர் தெரிவித்தார்.
தற்போது ரிங்கிட்டை வலுப்படுத்தும் காரணிகளில், அமெரிக்க டாலரின் நிலை மற்றும் மலேசியாவின் வலுவான பொருளாதார அடிப்படைகளைப் பிரதிபலிக்கும் உள்நாட்டுக் காரணிகளின் கலவை ஆகியவை அடங்கும்.
“மலேசியாவும் நல்ல பொருளாதார வாய்ப்புகளைக் கொண்டுள்ளது, மேலும் இந்தக் காரணி ரிங்கிட்டின் செயல்பாட்டிற்குத் தொடர்ந்து ஆதரவளிக்கும் என்று எதிர்பார்க்கப்படுகிறது,” என்று அவர் கூறினார்.
2025ஆம் ஆண்டுக்கான வருடாந்திர அறிக்கை (LT 2025) வெளியீட்டையொட்டி நடைபெற்ற ஊடக சந்திப்பில் அவர் இவ்வாறு கூறினார். மேலும், 2025 ஆம் ஆண்டுக்கான பொருளாதார மற்றும் பணவியல் கண்ணோட்டம் (TEM 2025) மற்றும் 2025 ஆம் ஆண்டின் இரண்டாம் பாதிக்கான நிதி நிலைத்தன்மை கண்ணோட்டம் (TKK ST2 2025) ஆகியவையும் சமர்ப்பிக்கப்பட்டன.
மேலும் விவரித்த அவர், சீர்திருத்த நடவடிக்கைகளுக்கான அர்ப்பணிப்பும், வலுவான நடப்புக் கணக்கு உபரியும் ரிங்கிட்டிற்கு நிலையான ஆதரவை வழங்குகின்றன என்றார்.
இவ்வாறு நிலவும் சூழல், முதலீட்டாளர்களின் தொடர்ச்சியான நம்பிக்கையை ஊக்குவித்துள்ளது.இருப்பினும், மேற்கு ஆசியாவில் ஏற்படும் மோதல்கள் ரிங்கிட்டின் நகர்வைப் பாதிக்க வாய்ப்புள்ளது.இருப்பினும், இந்த விளைவு சந்தை மனநிலையால் அதிகம் உந்தப்பட்டது என்று அவர் கூறினார்.
அவரைப் பொறுத்தவரை, காலப்போக்கில் கட்டமைக்கப்பட்ட ரிங்கிட்டின் அடிப்படை வலிமையே முக்கிய காரணியாக விளங்குகிறது. கடந்த ஆண்டு, ரிங்கிட் அமெரிக்க டாலர் மற்றும் முக்கிய வர்த்தகப் பங்காளிகளுக்கு எதிராக மிகச் சிறந்த செயல்திறன் கொண்ட நாணயமாக உருவெடுத்தது.பெயரளவு பயனுள்ள மாற்று விகிதம் (NEER) 6.3 சதவீதம் அதிகரித்தது.
