புதுடெல்லி, 06 பிப்ரவரி 2026 : இந்தியா மற்றும் இலங்கை இடையே ஆழமான நாகரிக மற்றும் ஆன்மிக தொடர்புகள் உள்ளன என்று பிரதமர் நரேந்திர மோடி தெரிவித்துள்ளார். குஜராத் மாநிலம் ஆரவல்லி மாவட்டத்தில் உள்ள தேவ்னிமோரி என்ற பெளத்த தொல்லியல் தளத்தில் கண்டுபிடிக்கப்பட்ட புத்தரின் புனிதச் சின்னங்கள், இலங்கை தலைநகர் கொழும்பில் உள்ள புகழ்பெற்ற கங்காராமையா பெளத்த கோயிலில் பொதுமக்கள் பார்வைக்காக முதல் முறையாக சர்வதேச அளவில் காட்சிப்படுத்தப்பட்டுள்ளன.
இலங்கை அதிபர் அனுர குமார திசாநாயக்க இந்தக் கண்காட்சியை தொடங்கி வைத்து, புனிதச் சின்னங்களை அனுப்பியதற்காக இந்திய அரசு மற்றும் பிரதமர் மோடிக்கு நன்றி தெரிவித்தார். இதனைத் தொடர்ந்து, கடந்த ஆண்டு தனது இலங்கை பயணத்தின் போது இந்தக் காட்சியை அறிவித்ததை நினைவுகூர்ந்த மோடி, இரக்கம், அமைதி மற்றும் நல்லிணக்கத்தை போதிக்கும் புத்தரின் அழியாத செய்தி மனிதகுலத்திற்கு தொடர்ந்து வழிகாட்ட வேண்டும் என்றும் கூறினார்.
இந்தியாவின் முக்கிய பெளத்த தொல்லியல் தளங்களில் ஒன்றான தேவ்னிமோரியில் நடைபெற்ற அகழ்வாராய்ச்சியில் புத்தரின் புனிதச் சாம்பல், செப்பு பெட்டி, தங்கம் மற்றும் வெள்ளித் தகடுகள் கொண்ட சரீர ஸ்தூபம் உள்ளிட்ட அரிய பொருட்கள் கண்டறியப்பட்டன; அவை வதோதராவில் பாதுகாக்கப்பட்டு, இந்திய விமானப்படையின் சிறப்பு விமானம் மூலம் கொழும்புக்கு கொண்டு செல்லப்பட்டன. மேலும், அனுராதபுரம் புனித நகர மேம்பாட்டு திட்டத்திற்கு இந்தியா மானிய உதவி வழங்கியதுடன், இந்தியா–இலங்கை பெளத்த உறவுகளை வலுப்படுத்த 2020ஆம் ஆண்டு 15 மில்லியன் டாலர் நிதியும் அறிவிக்கப்பட்டது குறிப்பிடத்தக்கது.
