இயல்பு நிலைக்கு திருப்புகிறது பகாங், பேராக் மற்றும் கிளாந்தான் மாநிலங்கள்

ஜனவரி 6, பகாங், பேராக் மற்றும் கிளாந்தான் மாநிலங்களில் வெள்ளத்தின் நிலை தற்போது சீரடைந்து வருவதாக தெரிய வந்துள்ளது. வெள்ளத்தினால் பாதிக்கப்பட்டவர்களின் எண்ணிக்கை 34,240-லிருந்து 31,800-ஆக குறைந்துள்ளது.
இந்நிலையில், ஜொகூர் மாநிலத்தில் வெள்ளத்தின் நிலை இதுவரை மாற்றமடையவில்லை எனவும் பாதிக்கப்பட்ட மக்கள் செகாமாட் பகுதிகளில் உள்ள பாதுகாப்பு மையங்களில் தங்கியிருப்பதாகவும் தகவல் கிடைத்துள்ளது.
தொடர்ந்து, பகாங் மாநிலத்தில் வெள்ளத்தினால் பாதிக்கப்பட்டவர்களின் எண்ணிக்கை 22,896-லிருந்து 21,471-ஆக சரிந்துள்ளது. மேலும், பேராக்கிலும் பாதிக்கப்பட்ட மக்களின் எண்ணிக்கை 5,545-ஆக குறைந்துள்ளது.

இதனிடையே, வெள்ளத்தினால் கடும் பாதிப்பு அடைந்த கிளாந்தானில் 4,784 பேர் மட்டுமே தற்போது பாதுகாப்பு மையங்களில் தங்கி வருவதாக அம்மாநில சமூக நல இலாகா தெரிவித்தது.