சிலாங்கூர், 21 நவம்பர் 2026 : சுக்மா XXII மற்றும் பாரா சுக்மா சிலாங்கூர் 2026 விளையாட்டுப் போட்டிகளில் பதக்கங்களை வென்று மாநிலத்திற்குப் பெருமை சேர்த்த வீரர்கள், அணிகளின் நிர்வாகத்தினர் மற்றும் விளையாட்டுச் சங்கங்களுக்கு சிலாங்கூர் மாநில அரசு மொத்தம் RM6.4 மில்லியன் ஊக்கத்தொகையை ஒதுக்கியுள்ளது.
பதக்க வெற்றியாளர்களை அங்கீகரிக்கும் வகையில் நடைபெற்ற சிறப்பு நிகழ்ச்சியில் இந்த ஊக்கத்தொகை அறிவிக்கப்பட்டது. இதில் அதிகபட்சமாக 34 தங்கம், 6 வெள்ளி, 20 வெண்கலப் பதக்கங்களை வென்ற பாரா நீச்சல் அணிக்கு RM881,500 வழங்கப்பட்டது. அதனைத் தொடர்ந்து 23 தங்கம், 11 வெள்ளி, 15 வெண்கலப் பதக்கங்களைப் பெற்ற நீர்விளையாட்டு அணிக்கு RM668,000 ஊக்கத்தொகை ஒதுக்கப்பட்டது.
தனிநபர் பிரிவில் நீச்சல் வீராங்கனை ஷானன் டானுக்கு RM108,000 வழங்கப்பட்டது. பாரா நீச்சல் வீராங்கனை அலிஷா ஆரியானா பிந்தி முகமது கைருல் அஸ்லிக்கு RM104,000 ஊக்கத்தொகை வழங்கப்பட்டது.
விளையாட்டு வீரர்களின் சாதனைகளையும் கடின உழைப்பையும் அங்கீகரிப்பதுடன், மாநிலத்தின் விளையாட்டுத் துறையை மேலும் மேம்படுத்தும் நோக்கிலும் இந்த ஊக்கத்தொகை வழங்கப்படுவதாக சிலாங்கூர் மாநில அரசு தெரிவித்துள்ளது.







