கோலாலம்பூர், 12 நவம்பர் 2026 : ரிங்கிட் நாணயம், புதன்கிழமை வர்த்தக முடிவில் அமெரிக்க டாலரைத் தவிர்த்து, பெரும்பாலான முக்கிய உலக மற்றும் ஆசியான் நாடுகளின் நாணயங்களுக்கு எதிராக வலுவடைந்தது. அமெரிக்காவில் வட்டி விகிதம் மீண்டும் உயர்த்தப்படலாம் என்ற எதிர்பார்ப்பு காரணமாக, அமெரிக்க டாலருக்கு எதிராக மட்டும் ரிங்கிட்டின் மதிப்பு சரிந்தது.
மாலை 6 மணியளவில், அமெரிக்க டாலருக்கு எதிரான ரிங்கிட்டின் மதிப்பு 4.0710/0745 ஆகப் பதிவானது. செவ்வாய்க்கிழமை வர்த்தக முடிவில் இது 4.0540/0580 ஆக இருந்தது.
அமெரிக்காவில் அக்டோபர் மாதப் பணவீக்கம் எதிர்பார்த்ததைவிட அதிகமாகப் பதிவானதே இந்த மாற்றத்திற்குக் காரணம் எனக் கூறப்படுகிறது. இதனால், வரும் டிசம்பர் மாதத்தில் அமெரிக்க மத்திய வங்கி வட்டி விகிதத்தை உயர்த்தக்கூடும் என்ற எதிர்பார்ப்பு அதிகரித்துள்ளது. டிசம்பர் மாதத்தில் வட்டி விகிதம் உயர்த்தப்படுவதற்கான வாய்ப்பு 80 சதவீதத்துக்கும் அதிகமாக இருப்பதாக பாங்க் முஆமலாத் மலேசியா வங்கியின் தலைமைப் பொருளாதார நிபுணர் டாக்டர் முகமது அஃப்சானிசாம் அப்துல் ரஷீத் தெரிவித்துள்ளார்.
இதற்கிடையில், யூரோவுக்கு எதிராக ரிங்கிட் 4.5343 ஆகவும், பிரிட்டிஷ் பவுண்டுக்கு எதிராக 5.4246 ஆகவும் வலுப்பெற்றது. ஜப்பானிய யென்னுக்கு எதிராகவும் ரிங்கிட்டின் மதிப்பு சற்று உயர்ந்தது. ஆசியான் நாடுகளின் நாணயங்களுக்கு எதிராகவும் ரிங்கிட் பெரும்பாலும் ஏற்றம் கண்டது. தாய்லாந்து பாட், இந்தோனேசிய ரூபியா மற்றும் பிலிப்பைன்ஸ் பெசோ ஆகியவற்றுக்கு எதிராக அதன் மதிப்பு உயர்ந்தது.
எனினும், சிங்கப்பூர் டாலருக்கு எதிராக ரிங்கிட்டின் மதிப்பு சற்று சரிந்தது. செவ்வாய்க்கிழமை 3.1726 ஆக இருந்த சிங்கப்பூர் டாலருக்கு எதிரான ரிங்கிட்டின் மதிப்பு, புதன்கிழமை 3.1745 ஆகப் பதிவானது.
அமெரிக்காவின் பணவீக்க நிலவரம் மற்றும் அந்நாட்டின் வட்டி விகிதம் குறித்த எதிர்பார்ப்புகள் சர்வதேச நாணயச் சந்தையில் தொடர்ந்து தாக்கத்தை ஏற்படுத்தி வருகின்றன.
