வாஷிங்டன், 11 நவம்பர் 2026 : என்விடியா நிறுவனத்தின் தலைமைச் செயல் அதிகாரி ஜென்சன் ஹுவாங்குடன் தொடர்புடைய சீனத் தொழிலதிபர் ஆலிஸ் ஹுவாங், நிதித்துறையில் தனது பணியைத் தொடங்கி, பின்னர் செயற்கை நுண்ணறிவுக்குத் தேவையான கணினிச் சிப் வர்த்தகத்தில் ஈடுபட்டுள்ளார். தற்போது அவரது வர்த்தகத் தொடர்புகள் அமெரிக்க அதிகாரிகளின் கவனத்தைப் பெற்றுள்ளன.
ஆலிஸ் ஹுவாங், சீனாவில் நிதி மற்றும் முதலீட்டுத் துறையில் பல்வேறு பொறுப்புகளை வகித்தவர். பின்னர் சிங்கப்பூரைத் தலைமையிடமாகக் கொண்ட மேகாஸ்பீட் இன்டர்நேஷனல் (Megaspeed International) என்ற நிறுவனத்தின் முக்கியப் பங்குதாரராக மாறினார். இந்த நிறுவனம் கணினி மற்றும் கிளவுட் சேவைகளை வழங்கி வருகிறது.
என்விடியா நிறுவனத்தின் கிளவுட் சேவை கூட்டாளர்களில் மேகாஸ்பீட் நிறுவனமும் இடம்பெற்றுள்ளது. அமெரிக்காவின் ஏற்றுமதிக் கட்டுப்பாடுகளுக்கு உட்பட்ட மேம்பட்ட என்விடியா சிப்களைச் சீன நிறுவனங்கள் பெறுவதற்கு இந்த நிறுவனம் உதவியதா என்பது குறித்து அமெரிக்க அதிகாரிகள் விசாரணை நடத்தி வருகின்றனர். இருப்பினும், நிறுவனம் விதிமீறலில் ஈடுபட்டதாக இதுவரை உறுதி செய்யப்படவில்லை.
ஆலிஸ் ஹுவாங், என்விடியா தலைமைச் செயல் அதிகாரி ஜென்சன் ஹுவாங்கின் உறவினர் அல்லர். ஆனால், இருவருக்கும் நெருக்கமான தனிப்பட்ட தொடர்பு இருப்பதாகச் சில சர்வதேச ஊடகங்கள் செய்தி வெளியிட்டுள்ளன.
இதற்கிடையில், ஆலிஸ் ஹுவாங் சீன உளவுத்துறையுடன் தொடர்புடையவராக இருந்து, ஜென்சன் ஹுவாங்குடனான நெருக்கத்தைப் பயன்படுத்தி அமெரிக்காவின் முக்கியத் தகவல்களைச் சீனாவுக்குப் பகிர்ந்ததாக நியூயார்க் டைம்ஸ் செய்தி வெளியிட்டுள்ளது. இந்தக் குற்றச்சாட்டை ராய்ட்டர்ஸ் சுயமாக உறுதிப்படுத்தவில்லை. சீன அரசும் இதனை மறுத்துள்ளது.
இந்த விவகாரம் தொடர்பாக, என்விடியா நிறுவனத்தின் நிர்வாகக் குழு சுயாதீன விசாரணையைத் தொடங்கியுள்ளது. ஜென்சன் ஹுவாங் வெளிநாட்டு உளவு நடவடிக்கையின் இலக்காக இருந்தாரா என்பதும் விசாரிக்கப்படுகிறது. மேலும், நிறுவனத்தின் வர்த்தக ரகசியங்கள் அல்லது அமெரிக்காவின் தேசியப் பாதுகாப்பு தொடர்பான தகவல்கள் கசிந்ததற்கான ஆதாரம் எதுவும் தற்போது இல்லை என என்விடியா தெரிவித்துள்ளது.
அமெரிக்க அதிபர் டொனால்ட் டிரம்பும் இந்த விவகாரம் குறித்து எப்.பி.ஐ. விசாரணை நடத்தி வருவதாகக் கூறியுள்ளார். ஆலிஸ் ஹுவாங் உளவாளி என்பது தனக்குத் தெரியாது என்று ஜென்சன் ஹுவாங் தம்மிடம் தெரிவித்ததாகவும் டிரம்ப் குறிப்பிட்டுள்ளார். சீனாவில் நிதித்துறையில் தொடங்கி, சர்வதேச சிப் வர்த்தகம் வரை ஆலிஸ் ஹுவாங் மேற்கொண்டுள்ள பயணம், என்விடியா நிறுவனத்துடனான அவரது தொடர்பு மற்றும் உளவு குற்றச்சாட்டுகள் ஆகியவை தற்போது சர்வதேச கவனத்தைப் பெற்றுள்ளன.
