காடெக், மலாக்கா, 06 நவம்பர் 2026 : மலாக்கா மாநிலத்தின் காடெக் (Gadek) சட்டமன்றத் தொகுதியில் தேசிய முன்னணி (BN) வேட்பாளர் நாடராஜா செல்லப்பா இன்று பல்வேறு பகுதிகளில் தேர்தல் பிரசாரத்தில் ஈடுபட்டு, பொதுமக்களை நேரில் சந்தித்து ஆதரவு திரட்டினார்.
தாமான் மகிசா பகுதியில் உள்ள கெடாய் அலோங் உணவகத்தில் பொதுமக்களுடன் காலை உணவு மற்றும் தேநீர் அருந்தி உரையாடினார். பின்னர் கம்போங் காடெக் டாலாம் பகுதியில் வீடு வீடாகச் சென்று மக்களைச் சந்தித்து அவர்களின் குறைகளையும் எதிர்பார்ப்புகளையும் கேட்டறிந்தார்.
இதனைத் தொடர்ந்து, தஞ்சோங் ரிமாவ் பகுதியில் உள்ள டி’ஜாபெருன் உணவகத்தில் நடைபெற்ற சந்திப்பிலும் அவர் பங்கேற்றார். இந்நிகழ்வில் பஹாங் மாநில மாண்புமிகு முதலமைச்சர் மற்றும் தேசிய முன்னணியின் ஆதரவாளர்கள் கலந்துகொண்டு நாடராஜா செல்லப்பாவுக்கு ஆதரவு தெரிவித்தனர்.
மேலும், வெள்ளிக்கிழமை தொழுகைக்குப் பின்னர் அரோங்கான் வாக்குச் சேகரிப்பு மையத்திற்கு உட்பட்ட பள்ளிவாசல் வளாகத்தில் தொழுகைக்கு வந்திருந்தவர்களைச் சந்தித்து உரையாடினார். குறிப்பாக, மூத்த குடிமக்களின் ஆலோசனைகளையும் எதிர்பார்ப்புகளையும் கேட்டறிந்தார்.
காலை முதல் மாலை வரை நடைபெற்ற இந்தச் சந்திப்புகளின்போது, பொதுமக்களின் வாழ்த்துகள், ஆதரவு மற்றும் பிரார்த்தனைகள் தமக்கு மேலும் ஊக்கமளிப்பதாக நாடராஜா செல்லப்பா தெரிவித்தார்.
காடெக் தொகுதியின் மேம்பாட்டிற்காக மக்களுடன் இணைந்து தொடர்ந்து பணியாற்றுவதே தமது நோக்கம் என்றும், அனைத்து இன மக்களிடையேயும் ஒற்றுமையையும் பரஸ்பர மரியாதையையும் வலுப்படுத்த வேண்டும் என்றும் அவர் வலியுறுத்தினார்.
வரும் நவம்பர் 14ஆம் தேதி நடைபெறவுள்ள தேர்தலில் தேசிய முன்னணியின் வேட்பாளராகப் போட்டியிடும் நாடராஜா செல்லப்பா, வேட்பாளர் எண் 4 – தேசிய முன்னணி (BN) சார்பில் வாக்காளர்களைச் சந்தித்து ஆதரவு திரட்டி வருகிறார்.
