கோலாலம்பூர், 02 நவம்பர் 2026 : கோலாலம்பூரில் நடைபெற்ற 11-வது சர்வதேச திறந்தநிலை கராத்தே சாம்பியன்ஷிப் போட்டியில், மலேசிய அரச காவல்துறையைச் சேர்ந்த போஹராஜ் செல்வராஜு இரண்டு தங்கப் பதக்கங்களையும் ஒரு கோப்பையையும் வென்று சாதனை படைத்துள்ளார்.
‘கே.எல். மேயர்ஸ் கப் 2026’ என்ற பெயரில் நடைபெற்ற இப்போட்டி, கோலாலம்பூரில் உள்ள தித்திவாங்சா விளையாட்டு அரங்கில் நடைபெற்றது. மலேசிய அரச காவல்துறையின் (PDRM) கோலா குபு பாரு காவல்துறை பயிற்சிக் கல்லூரியின் பாதுகாப்பு மற்றும் சடங்குப் பிரிவில் பணியாற்றும் காவலர் போஹராஜ் செல்வராஜு, இப்போட்டியில் காவல்துறை அணியைப் பிரதிநிதித்துவப்படுத்திப் பங்கேற்றார்.
அவர் தனிநபர் குமித்தே மற்றும் குழு குமித்தே ஆகிய இரு பிரிவுகளிலும் தங்கப் பதக்கங்களை வென்றார். மேலும், ஒரு கோப்பையையும் கைப்பற்றி காவல்துறைக்குப் பெருமை சேர்த்துள்ளார். அவரது வெற்றி, விளையாட்டுத் துறையில் அவர் கொண்டுள்ள அர்ப்பணிப்பு, கட்டுப்பாடு மற்றும் விடாமுயற்சியை வெளிப்படுத்துவதாக அமைந்துள்ளது.
போஹராஜ் செல்வராஜுவின் சாதனைக்குப் பாராட்டுத் தெரிவித்துள்ள கோலா குபு பாரு காவல்துறை பயிற்சிக் கல்லூரி நிர்வாகத்தினர், அவர் தொடர்ந்து பல்வேறு போட்டிகளில் பங்கேற்று மேலும் பல வெற்றிகளைப் பெற வாழ்த்துகளைத் தெரிவித்துள்ளனர்.
