ஆப்ரிக்கா, 02 நவம்பர் 2026 : ஆப்பிரிக்க நாடான சாட்டில், தண்ணீர் பயன்பாடு தொடர்பாக இரு சமூகத்தினரிடையே ஏற்பட்ட மோதல் துப்பாக்கிச் சண்டையாக மாறியதில் 25 பேர் உயிரிழந்தனர். மேலும், 22 பேர் காயமடைந்தனர்.
சாட்டின் மத்திய பகுதியில் கடந்த அக்டோபர் 30ஆம் தேதி இந்தச் சம்பவம் நிகழ்ந்ததாகத் தகவல்கள் தெரிவிக்கின்றன. காலநிலை மாற்றத்தால் கடுமையாகப் பாதிக்கப்பட்ட நாடுகளில் ஒன்றான சாட்டில், தண்ணீர், நிலம் மற்றும் கால்நடைகளுக்கான மேய்ச்சல் உரிமைகள் தொடர்பாகப் பல்வேறு சமூகத்தினரிடையே அடிக்கடி மோதல்கள் ஏற்படுகின்றன.
கிரெடா சமூகத்தைச் சேர்ந்த கால்நடை மேய்ப்பவர் ஒருவர், தனது கால்நடைகளுக்குத் தண்ணீர் காட்டுவதற்காகக் குளம் ஒன்றுக்குச் சென்றுள்ளார். அப்போது, குக்கா சமூகத்தைச் சேர்ந்த ஒருவருக்கும் அவருக்கும் இடையே வாக்குவாதம் ஏற்பட்டதாக உள்ளூர் அதிகாரிகள் தெரிவித்துள்ளனர்.
இந்த வாக்குவாதம் முற்றிய நிலையில், கிரெடா சமூகத்தைச் சேர்ந்த நபர் துப்பாக்கியால் குக்கா சமூகத்தைச் சேர்ந்தவரின் காலில் சுட்டதாகக் கூறப்படுகிறது. இதையடுத்து இரு சமூகத்தினருக்கும் இடையே ஆயுத மோதல் வெடித்தது. இரு தரப்பினரும் துப்பாக்கிகளால் தாக்கிக் கொண்டதில் 25 பேர் உயிரிழந்ததாகவும், 22 பேர் காயமடைந்ததாகவும் அந்நாட்டு அரசு தெரிவித்துள்ளது.
மோதல் குறித்த தகவல் கிடைத்ததும் பாதுகாப்புப் படையினர் சம்பவ இடத்துக்கு விரைந்து சென்று நிலைமையைக் கட்டுக்குள் கொண்டுவந்தனர். இந்தச் சம்பவம் தொடர்பாக 39 பேர் கைது செய்யப்பட்டு, தலைநகர் நிஜாமேனாவுக்கு அழைத்துச் செல்லப்பட்டுள்ளதாகவும் தகவல்கள் தெரிவிக்கின்றன.
நிலைமையை அமைதிப்படுத்தவும், பொதுமக்களின் பாதுகாப்பை உறுதிப்படுத்தவும், மேலும் வன்முறை பரவுவதைத் தடுக்கவும் அரசு நடவடிக்கை எடுத்து வருகிறது.
சாட்டில் தண்ணீர் வளங்கள் சமமாகக் கிடைக்காத நிலை, குறிப்பாக வறட்சியும் காலநிலை மாற்றமும் ஏற்படுத்தும் அழுத்தங்கள், இத்தகைய மோதல்களுக்கு முக்கியக் காரணங்களாகக் கருதப்படுகின்றன. தண்ணீர் போன்ற அடிப்படை வளங்களுக்காக ஏற்படும் மோதல்கள் உயிரிழப்புகளுக்கு வழிவகுப்பது அந்நாட்டில் தொடர்ந்து கவலையை ஏற்படுத்தி வருகிறது.
