ஜோகூர், 27 அக்டோபர் 2026 : மலேசியாவின் பத்து அன்னம் தமிழ்ப்பள்ளி மாணவன் ஹரியக்ஷா ரிஷிதரன், 2026ஆம் ஆண்டுக்கான எலைட் டேக்வாண்டோ திறந்தநிலை சாம்பியன்ஷிப் போட்டியில் வெள்ளிப் பதக்கம் வென்று பள்ளிக்குப் பெருமை சேர்த்துள்ளார். அக்டோபர் 24 மற்றும் 25ஆம் தேதிகளில் ஆர் அண்ட் எஃப் வணிக வளாகத்தில் நடைபெற்ற இப்போட்டியில் சிறப்பாகப் பங்கேற்ற ஹரியக்ஷா, தனது திறமையை வெளிப்படுத்தி இரண்டாம் இடத்தைப் பிடித்தார்.
மாணவரின் இந்தச் சாதனையைப் பாராட்டிய பத்து அன்னம் தமிழ்ப்பள்ளி நிர்வாகம், அவரது விடாமுயற்சி, ஒழுக்கம், தன்னம்பிக்கை மற்றும் கடின உழைப்பு ஆகியவை மேலும் பல வெற்றிகளைப் பெற வழிவகுக்கும் என வாழ்த்துத் தெரிவித்தது.
இளம் வயதிலேயே விளையாட்டுத் துறையில் சாதனை படைத்துள்ள ஹரியக்ஷாவின் வெற்றி, பள்ளிக்கும் சக மாணவர்களுக்கும் பெருமையளிப்பதாக அமைந்துள்ளது. அவர் எதிர்காலத்திலும் பல்வேறு போட்டிகளில் பங்கேற்று மேலும் பல சாதனைகளைப் படைக்க வேண்டும் எனப் பள்ளி சமூகம் வாழ்த்தியுள்ளது.
