கோலாலம்பூர், 23 அக்டோபர் 2026 : நேபாளம்–திபெத் எல்லைப் பகுதியில் ஏற்பட்ட வெள்ளத்தில் மாயமான 54 மலேசியர்களின் குடும்பங்களுக்கு நிதி நிவாரணம் வழங்குவதில் ஏற்பட்டுள்ள முன்னேற்றத்தை மலேசியா சாலிடாரிட்டி ஃபேமிலீஸ் இன் ஹோப் (MASFIH) வரவேற்றுள்ளது.
பேங்க் நெகாரா மலேசியா (BNM) பாதிக்கப்பட்டவர்களுக்கான கடன் தவணை ஒத்திவைப்பை விரிவுபடுத்தியுள்ளதுடன், சில கட்டணத் தள்ளுபடிகள், சொத்துப் பாதுகாப்பு மற்றும் காப்பீட்டு உதவிகள் குறித்தும் பரிசீலித்து வருகிறது.
இருப்பினும், இந்தக் கடன் தவணை ஒத்திவைப்பு மாயமானவர்களின் பெயரில் உள்ள கடன்களுக்கே பொருந்துவதாகவும், அவர்களது குடும்ப உறுப்பினர்களின் சொந்த வீட்டு, வாகன மற்றும் தனிநபர் கடன்களுக்கு நிவாரணம் வழங்குவது இன்னும் உறுதிப்படுத்தப்படவில்லை என்றும் MASFIH தெளிவுபடுத்தியுள்ளது.
MASFIH ஒருங்கிணைப்பாளர் டாக்டர் மணிவண்ணன் ரெத்தினம், பாதிக்கப்பட்ட குடும்பங்களுக்காகத் தொடர்ந்து மேற்கொண்டுவரும் முயற்சிகளின் ஒரு பகுதியாக இந்த முன்னேற்றம் அமைந்துள்ளதாகத் தெரிவிக்கப்பட்டுள்ளது. மேலும், குடும்பங்களின் நிதிச் சுமையைக் குறைக்க ஆறு மாத கால விரிவான நிதி நிவாரணத் திட்டம், கட்டணச் சலுகைகள் மற்றும் காப்பீட்டு உதவிகளை வழங்க வேண்டும் என்றும் MASFIH வலியுறுத்தியுள்ளது.
