கோலாலம்பூர், 18 செப்டம்பர் 2026 : மத்திய கிழக்கில் கச்சா எண்ணெய் விநியோகம் தொடர்பான கவலைகள் குறைந்ததையடுத்து, சந்தை நிலவரம் மேம்பட்டதால் மலேசிய ரிங்கிட் வெள்ளிக்கிழமை காலை அமெரிக்க டாலர் மற்றும் முக்கிய நாணயங்களுக்கு எதிராக உயர்வுடன் தொடங்கியது.
காலை 8 மணியளவில், ரிங்கிட் அமெரிக்க டாலருக்கு எதிராக 4.0955/4.1015 ஆகப் பதிவானது. வியாழக்கிழமை வர்த்தக முடிவில் இது 4.0965/4.1010 ஆக இருந்தது.
Bank Muamalat Malaysia Bhd-ன் தலைமைப் பொருளாதார நிபுணர் டாக்டர் முகமது அஃப்ஸானிசாம் அப்துல் ரஷித் கூறுகையில், சவுதி அரேபியா சேதமடைந்த கிழக்கு-மேற்கு எண்ணெய்க் குழாயை சீரமைக்கும் பணியைத் தொடங்கியுள்ளதாக வெளியான தகவலும், ஹோர்முஸ் நீரிணை வழியாக எண்ணெய் கப்பல்களின் போக்குவரத்து தொடர்ந்து நடைபெறுவதும் கச்சா எண்ணெய் விநியோகம் குறித்த கவலையைத் தணித்துள்ளதாக தெரிவித்தார்.
இதன் காரணமாக, Brent கச்சா எண்ணெய் விலை 0.95 சதவீதம் குறைந்து ஒரு பீப்பாய்க்கு 104.82 அமெரிக்க டாலராகப் பதிவானது. இதேவேளை, அமெரிக்க கருவூலப் பத்திரங்களின் வருவாயும் குறைந்ததாக அவர் கூறினார்.
சந்தையின் கவனம் தற்போது ஜப்பான் வங்கியின் (BOJ) பணவியல் கொள்கை முடிவின் மீது திரும்பியுள்ளதாக டாக்டர் முகமது அஃப்ஸானிசாம் தெரிவித்தார். BOJ தனது கொள்கை வட்டி விகிதத்தை 25 அடிப்படைப் புள்ளிகள் உயர்த்தி 1.25 சதவீதமாக நிர்ணயிக்கும் என சந்தை எதிர்பார்ப்பு நிலவுவதாக அவர் குறிப்பிட்டார்.
மேலும், BOJ-ன் பொருளாதார மதிப்பீடு மற்றும் பணவியல் கொள்கை தொடர்பான அணுகுமுறையை சந்தை கவனிக்கும் என்றும், கடுமையான பணவியல் கொள்கையை நோக்கிய நிலைப்பாடு தொடர்ந்தால், ‘யென் கேரி டிரேட்’ குறைந்து அந்நியச் செலாவணி சந்தையில் ஏற்ற இறக்கம் அதிகரிக்கக்கூடும் என்றும் அவர் தெரிவித்தார்.
முக்கிய நாணயங்களுக்கு எதிராகவும் ரிங்கிட் உயர்வுடன் தொடங்கியது. யூரோவுக்கு எதிராக 4.7000/4.7069 ஆகவும், ஜப்பானிய யெனுக்கு எதிராக 2.6228/2.6268 ஆகவும், பவுண்டுக்கு எதிராக 5.4704/5.4784 ஆகவும் ரிங்கிட் உயர்ந்தது.
ஆசியான் நாணயங்களுக்கு எதிராக ரிங்கிட் கலவையான நிலவரத்தில் வர்த்தகமானது. சிங்கப்பூர் டாலருக்கு எதிராக ரிங்கிட் உயர்ந்த நிலையில், தாய்லாந்து பாட் மதிப்புக்கு எதிராக சரிந்தது. பிலிப்பைன்ஸ் பெசோ மற்றும் இந்தோனேசிய ரூபியாவுக்கு எதிராக ரிங்கிட் மாற்றமின்றி காணப்பட்டது.
