கோலாலம்பூர், 31 ஆகஸ்ட் 2026 : 69ஆவது தேசிய தினத்தை முன்னிட்டு மலேசிய மக்களுக்கு வாழ்த்து தெரிவித்துள்ள தேசிய ஒற்றுமை துணை அமைச்சர் யுனேஸ்வரன் ராமராஜ், நாட்டின் சுதந்திரத்தையும் ஒற்றுமையையும் பாதுகாப்பது ஒவ்வொரு மலேசியரின் பொறுப்பு என தெரிவித்துள்ளார்.
1957ஆம் ஆண்டு ஆகஸ்ட் 31ஆம் தேதி துங்கு அப்துல் ரஹ்மான் புத்ரா அல்-ஹாஜ் ஏழு முறை “மெர்டேக்கா” என முழங்கியதன் மூலம் சுதந்திரமான, இறையாண்மை கொண்ட நாடாக மலேசியா உருவெடுத்ததை நினைவுகூர்ந்த அவர், அந்தச் சுதந்திரம் எளிதில் கிடைத்த ஒன்றல்ல என குறிப்பிட்டார்.
சுதந்திரத்திற்காக போராடிய வீரர்கள், பாதுகாப்புப் படையினர், ராணுவத்தினர், காவல்துறையினர் மற்றும் சாதாரண மக்கள் செய்த தியாகங்களின் அடிப்படையிலேயே நாடு கட்டியெழுப்பப்பட்டதாக அவர் தெரிவித்தார்.
மேலும், மலேசியாவின் வளர்ச்சி ஒரு குறிப்பிட்ட இனம், மதம் அல்லது சமூகத்தின் பங்களிப்பால் மட்டும் உருவானதல்ல என்றும், விவசாயிகள், மீனவர்கள், ஆசிரியர்கள், செவிலியர்கள், தொழிலாளர்கள், அரசு ஊழியர்கள், தொழில்முனைவோர், பொறியாளர்கள், கலைஞர்கள், விளையாட்டு வீரர்கள் உள்ளிட்ட அனைத்து தரப்பினரின் பங்களிப்பும் நாட்டின் வளர்ச்சியில் முக்கியமானது என்றும் அவர் கூறினார்.
200க்கும் மேற்பட்ட இன மற்றும் துணை இனங்களையும், 130க்கும் மேற்பட்ட மொழிகள் மற்றும் வட்டார மொழிகளையும் கொண்ட மலேசியாவின் பன்முகத்தன்மை பலவீனம் அல்ல, அது நாட்டின் பலம் என யுனேஸ்வரன் வலியுறுத்தினார். “மொழி, மதம், கலாசாரம் மற்றும் வாழ்க்கை முறையில் நாம் வேறுபட்டிருந்தாலும், ஒரே ஜாலூர் ஜெமிலாங்கின் கீழ் நாம் அனைவரும் மலேசியர்கள் என்ற ஒரே அடையாளத்தைப் பகிர்ந்து கொள்கிறோம்,” என அவர் தெரிவித்தார்.
மலேசியா எந்த ஒரு இனம், மதம், பிரதேசம் அல்லது தலைமுறைக்கும் மட்டும் சொந்தமானது அல்ல என்றும், ஒவ்வொரு குடிமகனுக்கும் நாட்டில் சமமான இடமும் குரலும் இருப்பதை உறுதி செய்ய வேண்டும் என்றும் அவர் குறிப்பிட்டார்.
அரசியலமைப்பு முடியாட்சியின் கீழ், கூட்டரசு அரசியலமைப்பு மற்றும் ருக்குன் நெகாராவின் அடிப்படையில் அமைதி, நீதி, நல்லிணக்கம் மற்றும் நாட்டின் கண்ணியத்தை பாதுகாக்க வேண்டும் என்றும் அவர் கேட்டுக்கொண்டார்.
மேலும், “Malaysia MADANI: Kesejahteraan Dinikmati” என்ற கருப்பொருளுக்கு ஏற்ப, நாட்டின் முன்னேற்றம் பொருளாதார வளர்ச்சி அல்லது உயரமான கட்டடங்களால் மட்டும் அளவிடப்படக் கூடாது என்றும், அதன் பயன் ஒவ்வொரு குடும்பத்தின் வாழ்க்கையிலும், பள்ளிகள், மருத்துவமனைகள், கிராமங்கள் மற்றும் நாட்டின் அனைத்து பகுதிகளிலும் உணரப்பட வேண்டும் என்றும் அவர் கூறினார்.
வறுமை, ஊழல், வெறுப்பு, பாகுபாடு மற்றும் மக்களைப் பிளவுபடுத்தும் அரசியலில் இருந்து நாட்டை விடுவிப்பதும் இன்றைய சுதந்திரத்தின் முக்கியப் பொறுப்பு என யுனேஸ்வரன் குறிப்பிட்டார்.
“மலேசியா நமது வீடு. மலேசியா நமது பொறுப்பு. மலேசியா நமது பிள்ளைகளின் எதிர்காலம்,” எனக் குறிப்பிட்ட அவர், அடுத்த தலைமுறைக்கு அமைதியான, நீதியான, ஒற்றுமையான மற்றும் மனிதநேயமிக்க மலேசியாவை வழங்க அனைவரும் ஒன்றிணைந்து செயல்பட வேண்டும் என அழைப்பு விடுத்தார்.
அனைத்து மலேசியர்களுக்கும் 69ஆவது தேசிய தின நல்வாழ்த்துகளைத் தெரிவித்த யுனேஸ்வரன் ராமராஜ், “ஒன்றுபட்டால் நாம் வலிமையானவர்கள். ஒன்றிணைந்து சிறந்த மலேசியாவை உருவாக்குவோம். மெர்டேக்கா! மெர்டேக்கா! மெர்டேக்கா!” என வாழ்த்து தெரிவித்துள்ளார்.
