22 ஆகஸ்ட் 2026 : மலேசியாவில் வெளிநாட்டு தொழிலாளர்களை பணியமர்த்துவதற்கான விண்ணப்ப செயல்முறையை மேலும் சீரமைக்கும் வகையில், ஆகஸ்ட் 22, 2026 முதல் முதலாளிகள் Foreign Workers Centralized Management System (FWCMS) மூலம் ஆன்லைனில் விண்ணப்பங்களை சமர்ப்பிக்கலாம் என மனிதவள அமைச்சகம் (KESUMA) அறிவித்துள்ளது.
புதிய நடைமுறை நிர்வாகத் திறன், வெளிப்படைத்தன்மை மற்றும் செயல்திறனை மேம்படுத்தும் நோக்கத்துடன் அறிமுகப்படுத்தப்பட்டுள்ளது. இதன் மூலம் கைமுறை விண்ணப்பங்கள், அரசு அலுவலகங்களுக்கு முதலாளிகள் மீண்டும் மீண்டும் நேரில் செல்வது மற்றும் தேவையற்ற காத்திருப்பு நேரம் ஆகியவை குறையும் என KESUMA தெரிவித்துள்ளது.
புதிய முறையில், முதலாளிகள் முதலில் வேலைவாய்ப்புச் சட்டம் 1955-ன் பிரிவு 60K கீழ் தேவையான ஒப்புதலைப் பெற வேண்டும். அதன் பின்னர் FWCMS மூலம் eQuota விண்ணப்பத்தை சமர்ப்பிக்கலாம். தேவையான நிபந்தனைகள் மற்றும் ஆவணங்களை முழுமையாக பூர்த்தி செய்யும் விண்ணப்பங்களுக்கு 14 வேலை நாட்களுக்குள் நிபந்தனைக்குட்பட்ட ஒப்புதல் கடிதம் (SKB) பெறுவதற்கான இலக்கு நிர்ணயிக்கப்பட்டுள்ளது.
விண்ணப்பதாரர்கள் முதலில் தங்களது தகுதியை சரிபார்த்து, பிரிவு 60K தொடர்பான தேவைகளை பூர்த்தி செய்து, தேவையான ஆவணங்களைத் தயாரிக்க வேண்டும். பின்னர் FWCMS மூலம் eQuota விண்ணப்பத்தை சமர்ப்பித்து, தொடர்புடைய AKS நேர்காணலுக்கான ஏற்பாடுகளை மேற்கொள்ள வேண்டும். விண்ணப்பத்தின் நிலையை தொடர்ந்து கண்காணித்து, தேவையான அனைத்து ஒப்புதல்களும் கிடைத்த பின்னரே அடுத்தகட்ட நடவடிக்கைகளை மேற்கொள்ளுமாறு முதலாளிகளுக்கு அறிவுறுத்தப்பட்டுள்ளது.
வெளிநாட்டு தொழிலாளர் ஆட்சேர்ப்புக்கான விதிமுறைகள் தளர்த்தப்பட்டுள்ளதாக இந்த டிஜிட்டல் முறை பொருள்படாது என KESUMA தெளிவுபடுத்தியுள்ளது. அனைத்து விண்ணப்பங்களும் நடைமுறையில் உள்ள சட்டங்கள், தகுதி நிபந்தனைகள், வெளிநாட்டு தொழிலாளர் ஆட்சேர்ப்பு கொள்கைகள் மற்றும் தொடர்புடைய ஒழுங்குமுறை அமைப்புகளின் ஆய்வுக்கு உட்பட்டவையாக இருக்கும்.
இதனிடையே, உணவகத் துறைக்காக 15,000 வெளிநாட்டு தொழிலாளர் ஒதுக்கீட்டை நிறைவேற்றும் நடவடிக்கையையும் KESUMA முன்னெடுத்து வருகிறது. இதில் முதல் 5,000 ஒதுக்கீட்டுக்காக 1,033 முதலாளிகள் வழக்கு அடிப்படையிலான நேர்காணல் செயல்முறையில் ஈடுபட்டு வருவதாகவும், அவர்களது விண்ணப்பங்கள் ஒப்புதலுக்காக பரிசீலிக்கப்பட்டு வருவதாகவும் அமைச்சகம் தெரிவித்துள்ளது. மீதமுள்ள 10,000 ஒதுக்கீட்டுக்கான விண்ணப்பங்கள் புதிய FWCMS முறையில் சமர்ப்பிக்கப்பட வேண்டும்.
முன்னதாக வெளிநாட்டு தொழிலாளர் ஆட்சேர்ப்பு தொடர்பான பணிகள் கைமுறையாகவும் நேரடி வருகை முறையிலும் மேற்கொள்ளப்பட்ட நிலையில், புதிய டிஜிட்டல் நடைமுறை முதலாளிகளின் சிரமங்களைக் குறைக்கும் வகையில் அமைந்துள்ளது. KDN-இலிருந்து KESUMA-க்கு OSC செயல்பாடுகள் மாற்றப்பட்ட பின்னர், 4,646 முதலாளிகளின் விண்ணப்பங்கள் பெறப்பட்டு செயலாக்கப்பட்டு வருவதாகவும் தெரிவிக்கப்பட்டுள்ளது.
மேலும், கோலாலம்பூர் அனைத்துலக விமான நிலையத்தில் வெளிநாட்டு தொழிலாளர்கள் அதிக அளவில் வருவதால் ஏற்படும் நெரிசலைக் குறைக்கும் வகையில், வெளிநாட்டு தொழிலாளர் போக்குவரத்து மையம் ஒன்றை அமைக்கும் முன்மொழிவையும் KESUMA ஆய்வு செய்து வருகிறது. இதற்கான சாத்தியக்கூறுகள் பரிசீலிக்கப்பட்டு, எதிர்காலத்தில் முன்னோடி திட்டமாக செயல்படுத்தப்படும் என தெரிவிக்கப்பட்டுள்ளது.
வெளிநாட்டு தொழிலாளர்களின் தேவையை பூர்த்தி செய்வதுடன், நாட்டின் தொழில்துறை மற்றும் பொருளாதார வளர்ச்சிக்கு ஆதரவளிக்கும் வகையில் ஆட்சேர்ப்பு நடைமுறைகளை திறமையாக செயல்படுத்துவதே KESUMA-வின் நோக்கம் என அமைச்சகம் தெரிவித்துள்ளது.
