புத்ராஜெயா, 21 ஆகஸ்ட் 2026 : “கார்ப்பரேட் மாஃபியா” எனக் கூறப்படும் நடவடிக்கைகள் தொடர்பான விசாரணையின் தற்போதைய நிலை குறித்து மலேசிய காவல்துறை தலைமை ஆய்வாளர் (IGP) மற்றும் மலேசிய ஊழல் தடுப்பு ஆணையத்தின் (MACC) தலைமை ஆணையர் தெளிவான விளக்கத்தை வழங்க வேண்டும் என DAP தேசியத் தலைவர் கோபிந்த் சிங் தியோ வலியுறுத்தியுள்ளார்.
இந்த விவகாரம் தொடர்பாக இந்த ஆண்டு மார்ச் மாதம் அமைச்சரவை விரிவான விசாரணைக்கு உத்தரவிட்டதாக அவர் தெரிவித்தார். அதன்பின்னர் காவல்துறை மற்றும் MACC ஆகிய இரு அமைப்புகளும் குற்றச்சாட்டுகள் குறித்து விசாரணை நடத்துவதற்கு போதுமான கால அவகாசம் கிடைத்துள்ளதாக அவர் குறிப்பிட்டார்.
இந்த விவகாரம் பொதுமக்களின் மிகுந்த கவனத்திற்குரியது என்றும், சர்வதேச அளவிலும் தாக்கத்தை ஏற்படுத்தக்கூடியதாக இருப்பதால், சந்தை நம்பிக்கையிலும் பாதிப்பை ஏற்படுத்தக்கூடும் என்றும் கோபிந்த் சிங் தியோ தெரிவித்தார்.
இந்த விவகாரத்தில் பல தனிநபர்கள் திட்டமிட்டு செயல்பட்டதாகக் கூறப்படும் தகவல்கள் வெளியாகியுள்ள நிலையில், இதுவரை எத்தகைய நடவடிக்கைகள் மேற்கொள்ளப்பட்டுள்ளன என்பதையும், அடுத்தகட்டமாக என்ன நடவடிக்கை எடுக்கப்பட உள்ளது என்பதையும் அதிகாரிகள் தெளிவுபடுத்த வேண்டும் என அவர் கேட்டுக்கொண்டார்.
மேலும், விசாரணைக்கு உதவக்கூடிய முக்கிய நபர்களில் ஒருவராகக் குறிப்பிடப்படும் விக்டர் சின், விசாரணைக்கு அழைக்கப்பட்டாரா அல்லது அதிகாரிகளுக்கு ஒத்துழைத்து வருகிறாரா என்பது குறித்தும் காவல்துறை மற்றும் MACC தெளிவுபடுத்த வேண்டும் என அவர் வலியுறுத்தினார்.
இந்த விவகாரத்தில் விசாரணை எந்த நிலையில் உள்ளது, அடுத்தகட்டமாக என்ன நடவடிக்கைகள் மேற்கொள்ளப்படும் மற்றும் விசாரணை எப்போது முடிக்கப்படும் என்பது குறித்து மலேசிய மக்களுக்கு அறியும் உரிமை உள்ளது என்றும் கோபிந்த் சிங் தியோ தெரிவித்தார்.
எனவே, IGP மற்றும் MACC தலைமை ஆணையர் தங்களது நிலைப்பாட்டை தாமதமின்றி அறிவித்து, இந்த விவகாரத்தை எவ்வாறு முடிவுக்குக் கொண்டு வர உள்ளனர் என்பதையும் தெளிவுபடுத்த வேண்டும் என அவர் கேட்டுக்கொண்டார்.
