சிலாங்கூர், 05 அக்டோபர் 2026 : டிஏபி கட்சியின் உறுப்பினர்கள், நண்பர்கள் மற்றும் ஆதரவாளர்களே கட்சியின் போராட்டத்திற்கான முக்கிய ஆதாரமாக விளங்குகின்றனர் என்று டிஜிட்டல் அமைச்சர் கோபிந்த் சிங் டியோ தெரிவித்துள்ளார். கட்சியின் தொலைநோக்குப் பார்வை மற்றும் இலக்குகளைச் சிறப்பாக முன்னெடுப்பதற்காக, உறுப்பினர்கள் தங்களது கருத்துகள், ஆலோசனைகள் மற்றும் பின்னூட்டங்களைத் தொடர்ந்து வழங்கி வருவதாக அவர் குறிப்பிட்டார்.
டாமான்சாரா மற்றும் செலாயாங் பகுதிகளைச் சேர்ந்த டிஏபி உறுப்பினர்களுடன் நடைபெற்ற இரவு விருந்து நிகழ்ச்சியில், 11 கிளைகளைச் சேர்ந்த ஏறத்தாழ 50 உறுப்பினர்களுடன் கலந்துகொண்டதாக கோபிந்த் சிங் டியோ தெரிவித்தார்.
இந்தச் சந்திப்பின்போது, உறுப்பினர்களின் ஆக்கபூர்வமான கருத்துகளையும் ஆலோசனைகளையும் கேட்டறிய வாய்ப்பு கிடைத்ததாகவும், கட்சிப் பணிகளில் தொடர்ந்து கவனம் செலுத்துவதற்கான ஊக்கத்தை அவர்களுக்கு வழங்கியதாகவும் அவர் கூறினார்.
சுதந்திரமான, நியாயமான மற்றும் ஜனநாயகக் கொள்கைகளை அடிப்படையாகக் கொண்ட மலேசியாவை உருவாக்குவதே டிஏபியின் நோக்கம் என்று குறிப்பிட்ட அவர், மனித உரிமைகள், சமூக நீதி, பண்பாட்டுப் பன்முகத்தன்மை மற்றும் நல்லாட்சி ஆகிய கொள்கைகளைத் தொடர்ந்து முன்னெடுக்கப் பாடுபடுவோம் என்றும் தெரிவித்தார்.
கட்சியின் ஒவ்வொரு செயல்பாட்டிலும் இந்தக் கொள்கைகளை நிலைநிறுத்தி, அதன் இலக்குகளைத் தொடர்ந்து வலுப்படுத்துவதே தங்களது நோக்கம் என்றும் கோபிந்த் சிங் டியோ தெரிவித்துள்ளார்.
