டெல்லி, 15 ஆகஸ்ட் 2026 : இந்தியாவின் 80-வது சுதந்திர தினம் இன்று நாடு முழுவதும் கொண்டாடப்பட்ட நிலையில், தலைநகர் டெல்லியில் உள்ள செங்கோட்டையில் நடைபெற்ற தேசிய விழாவில் பிரதமர் நரேந்திர மோடி தேசியக் கொடியை ஏற்றி வைத்து நாட்டு மக்களுக்கு உரையாற்றினார்.
சுதந்திர தின விழாவையொட்டி செங்கோட்டை மற்றும் அதைச் சுற்றியுள்ள பகுதிகளில் பலத்த பாதுகாப்பு ஏற்பாடுகள் செய்யப்பட்டிருந்தன. விழாவில் மத்திய அமைச்சர்கள், எதிர்க்கட்சித் தலைவர்கள் மற்றும் முக்கிய பிரமுகர்கள் கலந்து கொண்டனர். செங்கோட்டைக்கு வந்த பிரதமர் மோடியை பாதுகாப்புத்துறை அமைச்சர்கள் மற்றும் உயர் அதிகாரிகள் வரவேற்றனர். இதனைத் தொடர்ந்து முப்படைகள் மற்றும் டெல்லி காவல்துறை வீரர்களின் அணிவகுப்பு மரியாதையை பிரதமர் ஏற்றுக்கொண்டார்.
பின்னர் பிரதமர் தேசியக் கொடியை ஏற்றி வைத்து சுதந்திர தின உரையை நிகழ்த்தினார். தனது உரையில் நாட்டின் வளர்ச்சி, பொருளாதாரம், பாதுகாப்பு உள்ளிட்ட பல்வேறு முக்கிய அம்சங்கள் குறித்து அவர் பேசினார்.
சுதந்திரப் போராட்டத்தில் துணிச்சலுடன் போராடி தியாகம் செய்த எண்ணற்ற சுதந்திரப் போராட்ட வீரர்களை நினைவுகூர்ந்த பிரதமர், அவர்களின் கனவுகள் வளர்ச்சியடைந்த இந்தியாவை உருவாக்க தொடர்ந்து ஊக்கமளிப்பதாக தெரிவித்தார்.
140 கோடி இந்தியர்களின் கூட்டு முயற்சியால் நாட்டின் பல்வேறு துறைகளிலும் இந்தியா புதிய உயரங்களை நோக்கி முன்னேறி வருவதாக குறிப்பிட்ட பிரதமர், வரும் காலங்களில் இந்த வளர்ச்சிப் பயணம் மேலும் வேகமாகவும் சிறப்பாகவும் தொடர வேண்டும் என வாழ்த்து தெரிவித்தார்.
இந்த ஆண்டைய சுதந்திர தின விழாவில் இளைஞர்களின் பங்களிப்பை முன்னிலைப்படுத்தும் வகையில் “யுவ சக்தி”க்கு முக்கியத்துவம் அளிக்கப்பட்டதுடன், 150 ஆண்டுகளை நிறைவு செய்யும் ‘வந்தே மாதரம்’ பாடலும் செங்கோட்டை விழாவில் இடம்பெற்றது.
