14 ஆகஸ்ட் 2026 : ஹோர்முஸ் நீரிணையில் மேலும் இரண்டு கப்பல்கள் தாக்கப்பட்டதைத் தொடர்ந்து, ஈரான் மீது பொருளாதார அழுத்தத்தை மேலும் அதிகரிக்கப் போவதாக அமெரிக்கா எச்சரித்துள்ளது. இதனால் உலகின் முக்கிய கடல்வழிகளில் ஒன்றான ஹோர்முஸ் நீரிணை வழியாக கப்பல் போக்குவரத்து கிட்டத்தட்ட முடங்கும் நிலையை எட்டியுள்ளது.
வியாழக்கிழமை மாலை ஐக்கிய அரபு அமீரகத்தின் அரசுக்குச் சொந்தமான Abu Dhabi National Oil Company (ADNOC) நிறுவனத்தைச் சேர்ந்த இரண்டு கப்பல்கள் ஹோர்முஸ் நீரிணை வழியாகச் சென்றபோது தாக்கப்பட்டதாக ஐக்கிய அரபு அமீரகம் தெரிவித்துள்ளது. இந்தத் தாக்குதலுக்கு ஈரானே காரணம் என ஐக்கிய அரபு அமீரகம் குற்றம் சாட்டியுள்ளது. இந்தச் சம்பவத்தில் உயிரிழப்பு ஏற்பட்டதாக தகவல் இல்லை.
இதன் தாக்கமாக ஹோர்முஸ் நீரிணை வழியாகச் செல்லும் கப்பல்களின் எண்ணிக்கை கணிசமாகக் குறைந்துள்ளது. ஆகஸ்ட் மாதத்தில் தினசரி சராசரியாக 12 சரக்கு கப்பல்கள் கடந்து செல்லும் நிலையில், வியாழக்கிழமை 9 கப்பல்கள் மட்டுமே சென்றதாக Kpler தரவுகள் தெரிவிக்கின்றன. வெள்ளிக்கிழமை தொடக்கத்தில் கப்பல்கள் கடந்து சென்றதற்கான தகவல்கள் எதுவும் பதிவாகவில்லை.
இதனிடையே, அமெரிக்க பாதுகாப்புத்துறை அமைச்சர் பீட் ஹெக்செத், ஈரான் மீது விதிக்கப்பட்டுள்ள கடற்படை முற்றுகையை நீண்ட காலத்துக்கு தொடரும் திறன் அமெரிக்காவிடம் இருப்பதாக தெரிவித்துள்ளார். கப்பல்களை மாறி மாறி பயன்படுத்துவதன் மூலம் இந்த நடவடிக்கையை தொடர்ந்து மேற்கொள்ள முடியும் என அவர் கூறினார்.
அமெரிக்க நிதியமைச்சர் ஸ்காட் பெசென்ட், ஈரான் மீது இதுவரை இல்லாத அளவுக்கு கடுமையான பொருளாதார நடவடிக்கைகள் மேற்கொள்ளப்படும் என்றும், அடுத்த வாரம் புதிய நடவடிக்கைகள் அறிவிக்கப்படும் என்றும் தெரிவித்துள்ளார்.
ஹோர்முஸ் நீரிணை உலகளாவிய எரிசக்தி வர்த்தகத்தில் முக்கியத்துவம் வாய்ந்த கடல்வழியாகும். இங்கு கப்பல் போக்குவரத்து பாதிக்கப்படுவதால் எண்ணெய் விநியோகம் மற்றும் சர்வதேச எரிசக்தி சந்தைகளில் தொடர்ந்து அழுத்தம் ஏற்பட்டு வருகிறது. இதன் காரணமாக வெள்ளிக்கிழமை எண்ணெய் விலைகளும் உயர்ந்தன.
