கோலாலம்பூர், 09 ஆகஸ்ட் 2026 : மலேசியாவின் மாமன்னர் சுல்தான் இப்ராஹிம், நாட்டின் அனைத்து விமான நிலையங்கள் மற்றும் முக்கிய நுழைவாயில்களில் பாதுகாப்பு மற்றும் கண்காணிப்பு நடவடிக்கைகளை மேலும் தீவிரப்படுத்துமாறு சம்பந்தப்பட்ட அமைச்சகங்கள் மற்றும் அரசு அமைப்புகளுக்கு உத்தரவிட்டுள்ளார்.
போதைப்பொருள் கடத்தல் மற்றும் நாட்டின் பாதுகாப்புக்கும் பொது அமைதிக்கும் அச்சுறுத்தலாக அமையக்கூடிய எல்லை தாண்டிய குற்றச் செயல்களைத் தடுக்கும் வகையில் பாதுகாப்பு நடவடிக்கைகள் மேற்கொள்ளப்பட வேண்டும் என்று மாமன்னர் வலியுறுத்தியுள்ளார்.
நாட்டின் நுழைவாயில்களில் பாதுகாப்பை தொடர்ந்து வலுப்படுத்துவதுடன், சிறந்த அமலாக்க நடவடிக்கைகள், தொடர்ச்சியான கண்காணிப்பு மற்றும் சம்பந்தப்பட்ட அனைத்து அரசு அமைப்புகளுக்கும் இடையிலான நெருக்கமான ஒத்துழைப்பு ஆகியவற்றை உறுதி செய்ய வேண்டும் என்றும் சுல்தான் இப்ராஹிம் தெரிவித்துள்ளார்.
இதனிடையே, பிரதமர் டத்தோஸ்ரீ அன்வார் இப்ராஹிம், மாமன்னர் சுல்தான் இப்ராஹிமை சந்தித்து ஒரு மணி நேரத்திற்கும் மேலாக கலந்துரையாடினார். இந்தச் சந்திப்பு ஆகஸ்ட் 8ஆம் தேதி கோலாலம்பூரில் உள்ள இஸ்தானா புக்கிட் துங்குவில் நடைபெற்றது. சந்திப்பின்போது, லெம்பாகா தபுங் ஹாஜி (TH) தொடர்பான அரச ஆணைய விசாரணை அறிக்கையும், பெடரல் லேண்ட் கன்சாலிடேஷன் அண்ட் ரீஹேபிலிட்டேஷன் ஆணையம் (FELDA) தொடர்பான தற்போதைய விவகாரங்களும் மாமன்னரிடம் விளக்கமாக சமர்ப்பிக்கப்பட்டன.
இந்த விவகாரங்கள் தொடர்பான விசாரணைகள் முழுமையாகவும், எந்தத் தரப்பினருக்கும் பாரபட்சமின்றியும் மேற்கொள்ளப்பட வேண்டும் என்று மாமன்னர் உத்தரவிட்டுள்ளார். மேலும், தவறு செய்தவர்கள் யாராக இருந்தாலும் அவர்கள் மீது உரிய நடவடிக்கை எடுக்கப்படுவதை உறுதி செய்யும் வகையில், விசாரணைகள் “பூமிக்குள் உள்ள புழுவின் குழி வரை” எனப்படும் அளவுக்கு முழுமையாக மேற்கொள்ளப்பட வேண்டும் என்றும் அவர் வலியுறுத்தியுள்ளார்.
குற்றம் செய்தது உறுதி செய்யப்பட்ட எந்த நபரும் நடவடிக்கையிலிருந்து தப்பிக்கக் கூடாது என்றும், இதுபோன்ற சம்பவங்கள் எதிர்காலத்தில் மீண்டும் நடைபெறாமல் இருப்பதை உறுதி செய்வதே முக்கியம் என்றும் மாமன்னர் சுல்தான் இப்ராஹிம் தெரிவித்துள்ளார்.
“உண்மையில் குற்றம் செய்தவர் என நிரூபிக்கப்பட்டால், யாரும் நடவடிக்கையிலிருந்து தப்பக்கூடாது. முக்கியமாக, இதுபோன்ற விஷயங்கள் மீண்டும் நடைபெறக்கூடாது,” என்று மாமன்னர் சுல்தான் இப்ராஹிம் ராயல் பிரஸ் ஆபீஸ் (RPO)-க்கு தெரிவித்துள்ளார்.
