கோலாலம்பூர், 25 ஜூலை 2026 : கெடா மாநில மந்திரி பெசார் சனுசி முகமது நோர், மலாய்க்காரர் அல்லாதவர்களின் நாட்டுப்பற்றைக் கேள்விக்குட்படுத்தும் வகையிலான கருத்துகளை உடனடியாக நிறுத்த வேண்டும் என்று டிஏபி தேசியத் தலைவர் மற்றும் இலக்கவியல் அமைச்சர் கோபிந்த் சிங் டியோ வலியுறுத்தியுள்ளார்.
“இந்தியர்களுக்கு இந்தியா, சீனர்களுக்கு சீனா, மலாய்க்காரர்களுக்கு மலாய் மண்” என்ற சனுசியின் கருத்து சாதாரண அரசியல் பேச்சல்ல; அது வெளிப்படையான இனவாதமும், மலேசியாவின் பல்லின அடித்தளத்தின் மீது நடத்தப்படும் நேரடித் தாக்குதலும் ஆகும் என்று அவர் சாடியுள்ளார்.
மலேசிய இந்தியர்கள் இந்த நாட்டிலேயே பிறந்து வளர்ந்தவர்கள் என்றும், மலேசியாவே அவர்களின் ஒரே தாயகம் என்றும் கோபிந்த் சிங் டியோ குறிப்பிட்டார். அவர்களின் நாட்டுப்பற்றையும் விசுவாசத்தையும் கேள்விக்குட்படுத்துவது இனவாதத்தின் உச்சம் என்றும், நாட்டின் வளர்ச்சிக்காக உழைத்த கோடிக்கணக்கான மலேசியர்களை அவமதிக்கும் செயலாகும் என்றும் அவர் தெரிவித்தார்.
மலேசிய கூட்டாட்சி அரசியலமைப்பின் 8-ஆவது பிரிவு, இனம் அல்லது பின்னணியைப் பொருட்படுத்தாமல் அனைத்து குடிமக்களும் சட்டத்தின் முன் சமமானவர்கள் என்பதை உறுதி செய்கிறது என்றும், மலாய்க்காரர் அல்லாத சமூகங்களை இரண்டாம் தர குடிமக்களாக சித்தரிக்க எந்த அரசியல் தலைவருக்கும் உரிமையில்லை என்றும் அவர் வலியுறுத்தினார்.
ரயில்வே, சாலைகள், தோட்டங்கள், கல்வி, அரசு நிர்வாகம், சட்டம், சுகாதாரம், பாதுகாப்பு உள்ளிட்ட பல்வேறு துறைகளில் இந்திய சமூகத்தின் பங்களிப்பு நாட்டின் வளர்ச்சியுடன் பின்னிப் பிணைந்துள்ளது என்றும், அவர்கள் இந்த நாட்டின் விருந்தினர்கள் அல்ல; சம உரிமை கொண்ட மலேசிய குடிமக்கள் என்றும் கோபிந்த் சிங் டியோ கூறினார்.
நெகிரி செம்பிலான் தேர்தல் பிரசாரத்தின் போது சனுசி முன்வைக்கும் இனவாத கருத்துகள், மக்களின் உண்மையான பிரச்சினைகளுக்கு தீர்வு காணும் திட்டங்கள் பெரிக்காத்தான் நேஷனலிடம் இல்லை என்பதையே வெளிப்படுத்துகின்றன என்றும் அவர் குற்றம்சாட்டினார். பொருளாதார வளர்ச்சி, வேலைவாய்ப்பு, விலைவாசி உயர்வு, இளைஞர்களின் எதிர்காலம் மற்றும் மக்களின் வாழ்வாதாரம் போன்ற முக்கிய பிரச்சினைகளுக்குத் தீர்வு காண்பதற்குப் பதிலாக, இனவாத அரசியலின் மூலம் மக்களைப் பிரிக்கும் முயற்சியில் அந்தக் கூட்டணி ஈடுபட்டுள்ளதாகவும் அவர் விமர்சித்தார்.
வரவிருக்கும் நெகிரி செம்பிலான் மாநிலத் தேர்தலில் வாக்காளர்கள், குறிப்பாக இந்திய சமூகத்தினர், இனவாத அரசியலை நிராகரித்து பல்லின ஒற்றுமை, சமத்துவம் மற்றும் அரசியலமைப்புச் சட்டத்தில் உறுதி செய்யப்பட்ட நீதியைப் பாதுகாக்கும் வகையில் வாக்களிக்க வேண்டும் என்றும் கோபிந்த் சிங் டியோ அழைப்பு விடுத்துள்ளார். அவர் மேலும், “மலேசியா அனைவருக்கும் சொந்தமான நாடு; எந்த இனவாதப் பேச்சாலும் எங்களின் குடியுரிமையையோ, நாட்டுப்பற்றையோ, இந்த மண்ணின் மீதான உரிமையையோ பறிக்க முடியாது” என்று வலியுறுத்தினார்.
