பேராக், 20 ஜூலை 2026 : 2026-ஆம் ஆண்டிற்கான தேசிய மாதக் கொண்டாட்டம் மற்றும் ‘ஜாலூர் கெமிலாங்’ தேசியக் கொடி ஏற்றும் இயக்கத்தை பிரதமர் டத்தோ ஸ்ரீ அன்வார் இப்ராஹிம் ஞாயிற்றுக்கிழமை அதிகாரப்பூர்வமாகத் தொடக்கிவைத்தார்.
பேராக் மாநிலத்தில் அமைந்துள்ள சுல்தான் அஸ்லான் ஷா மலேசிய சுகாதார அமைச்சின் பயிற்சி நிறுவனத்தில் (ILKKM SAS) நடைபெற்ற இந்நிகழ்ச்சியில், அறிவியல், தொழில்நுட்பம் மற்றும் புத்தாக்க அமைச்சின் தலைமைச் செயலாளர் டத்தோ டி.எஸ். டாக்டர் நாகுலேந்திரன் கங்காயத்கராசு கலந்துகொண்டார்.
‘மலேசியா மடானி: நல்வாழ்வு அனைவருக்கும்’ என்ற கருப்பொருளில் நடைபெறும் இந்த ஆண்டின் தேசிய மாதக் கொண்டாட்டம், நாட்டின் வளர்ச்சி மற்றும் முன்னேற்றத்தின் பயன்கள் சமுதாயத்தின் அனைத்து தரப்பினருக்கும் சமமாகவும், உள்ளடக்கிய வகையிலும் சென்றடைய வேண்டும் என்ற மடானி அரசாங்கத்தின் உறுதிப்பாட்டை பிரதிபலிப்பதாகும்.
அறிவியல், தொழில்நுட்பம் மற்றும் புத்தாக்கம் (STI) ஆகியவற்றை தேசிய முன்னேற்றத்தின் முக்கிய உந்துசக்தியாக வலுப்படுத்துவதன் மூலம், மலேசியா மடானி இலக்குகளை முன்னெடுக்க அறிவியல், தொழில்நுட்பம் மற்றும் புத்தாக்க அமைச்சு தொடர்ந்து உறுதிபூண்டுள்ளதாக தெரிவிக்கப்பட்டுள்ளது.
மேலும், ‘#ஒருவீடு_ஒரு_ஜாலூர்கெமிலாங்’ (Satu Rumah Satu Jalur Gemilang) இயக்கத்தில் பொதுமக்கள் ஆர்வத்துடன் பங்கேற்று, தங்களது வீடுகள் மற்றும் அலுவலகங்களில் தேசியக் கொடியை ஏற்றி நாட்டுப்பற்றையும், ஒற்றுமையையும், அமைதியையும், வளமான மலேசியாவை உருவாக்கும் உறுதியையும் வெளிப்படுத்துமாறு அழைப்பு விடுக்கப்பட்டுள்ளது.
