கோலாலம்பூர், 03 ஜூலை 2026 : பிராந்திய மற்றும் உலகளாவிய சூழலில் அதிகரித்து வரும் சவால்கள் குறித்து, ஆசியாவிற்கான போவா மன்றத்தின் (Boao Forum for Asia – BFA) பொதுச் செயலாளர் ஜாங் ஜுனை, மலேசிய பிரதமர் அன்வர் இப்ராஹிம் சந்தித்து முக்கிய ஆலோசனை நடத்தினார்.
இந்தச் சந்திப்பின்போது, புவிசார் அரசியல் நிச்சயமற்ற தன்மைகள், பொருளாதார அழுத்தங்கள் மற்றும் வேகமாக வளர்ந்து வரும் தொழில்நுட்ப மாற்றங்கள் குறித்து இருவரும் கருத்துகளைப் பரிமாறிக் கொண்டனர்.
அப்போது பேசிய பிரதமர் அன்வர் இப்ராஹிம், தற்போதைய உலகச் சூழலில் பிராந்திய நாடுகளுக்கிடையேயான நெருக்கமான ஒத்துழைப்பு, அனைவரையும் உள்ளடக்கிய அணுகுமுறை மற்றும் உரையாடல் அடிப்படையிலான கூட்டாண்மை ஆகியவையே நிலைத்தன்மை, பொருளாதார செழிப்பு மற்றும் பகிரப்பட்ட நல்வாழ்வை உறுதிப்படுத்தும் முக்கிய அம்சங்கள் என வலியுறுத்தினார்.
மேலும், வர்த்தகம் மற்றும் முதலீடு, டிஜிட்டல் மாற்றம், செயற்கை நுண்ணறிவு (AI), எரிசக்தி மாற்றம், உணவுப் பாதுகாப்பு, கல்வி மற்றும் திறன் மேம்பாடு உள்ளிட்ட பல்வேறு துறைகளில், ஆசியாவிற்கான போவா மன்றத்துடன் மலேசியா தொடர்ந்து நெருக்கமாக இணைந்து செயல்படும் என்றும் அவர் தெரிவித்தார்.
இந்த ஒத்துழைப்பு முயற்சிகள், பிராந்தியத்தின் மீள்திறனை மேலும் வலுப்படுத்துவதுடன், அனைத்து மக்களுக்கும் பயனளிக்கும் புதிய கூட்டுறவு வாய்ப்புகளை உருவாக்கும் என்ற நம்பிக்கையையும் பிரதமர் அன்வர் இப்ராஹிம் வெளிப்படுத்தினார்.
