டெல்லி, 23 ஜூன் 2026 : காவிரி நீர் மேலாண்மை ஆணையத்தின் 52-வது கூட்டம் இன்று புதுடெல்லியில் நடைபெறுகிறது. ஆணையத் தலைவர் எஸ்.கே. ஹல்தார் தலைமையில் நடைபெறும் இந்தக் கூட்டத்தில், தமிழ்நாடு, கர்நாடகா, கேரளா மற்றும் புதுச்சேரியைச் சேர்ந்த அதிகாரிகள் நேரிலோ அல்லது காணொலி வாயிலாகவோ பங்கேற்க உள்ளனர்.
காவிரி நதி நீர்ப் பகிர்வு, அணைகளின் தற்போதைய நீர்மட்டம், மாநிலங்களுக்கு வழங்கப்பட வேண்டிய நீரின் அளவு மற்றும் பருவமழையை முன்னிட்டு மேற்கொள்ள வேண்டிய நடவடிக்கைகள் குறித்து விரிவாக ஆலோசிக்கப்படும் என எதிர்பார்க்கப்படுகிறது. மேலும், மாநிலங்களின் தற்போதைய நீர் தேவைகள் மற்றும் எதிர்கால மேலாண்மை திட்டங்களும் கூட்டத்தின் முக்கிய அம்சங்களாக இடம்பெறவுள்ளன.
தமிழ்நாடு, காவிரி நடுவர் மன்றம் மற்றும் உச்சநீதிமன்றத்தின் உத்தரவுகளின்படி கர்நாடகா உரிய அளவு நீரை திறந்துவிட வேண்டும் என்ற தனது நிலைப்பாட்டை மீண்டும் வலியுறுத்தும் என தகவல் வெளியாகியுள்ளது. மறுபுறம், கர்நாடகா தனது நீர் இருப்பு மற்றும் தேவைகள் தொடர்பான விவரங்களை கூட்டத்தில் எடுத்துரைக்க வாய்ப்புள்ளதாக கூறப்படுகிறது.
மேலும், மேகதாது அணைத் திட்டம் தொடர்பான விவகாரமும் கூட்டத்தில் எதிரொலிக்கும் என எதிர்பார்க்கப்படுகிறது. இந்த விவகாரம் தொடர்பாக நான்கு மாநிலங்களின் அதிகாரிகள் பங்கேற்கும் சிறப்புக் கூட்டம் நடத்துவது குறித்தும் ஆலோசனை நடைபெறலாம் என தகவல்கள் தெரிவிக்கின்றன.
காவிரி நீர் பகிர்வு தொடர்பான பிரச்சினைகளுக்கு நீடித்த தீர்வு காண்பதிலும், மாநிலங்களுக்கிடையேயான ஒத்துழைப்பை வலுப்படுத்துவதிலும் இந்தக் கூட்டம் முக்கியத்துவம் வாய்ந்ததாகக் கருதப்படுகிறது.
