வாஷிங்டன், 06 ஜூன் 2026 : இந்திய பிரதமர் மோடி தமது நல்ல நண்பர் என்றும், இந்தியாவுக்கும் அமெரிக்காவுக்கும் இடையிலான வர்த்தக ஒப்பந்தம் விரைவில் எட்டப்படும் என்றும் அமெரிக்க அதிபர் டிரம்ப் நம்பிக்கை தெரிவித்துள்ளார்.
வெள்ளை மாளிகையில் செய்தியாளர்களிடம் பேசிய அவர், “இந்தியாவுடன் நாங்கள் ஒப்பந்தத்தை எட்டுவோம். பிரதமர் மோடியை எனக்கு மிகவும் பிடிக்கும். அவர் எனது நல்ல நண்பர். நாங்கள் சிறப்பாக இணைந்து செயல்படுகிறோம்; ஒரு வர்த்தக ஒப்பந்தம் நிச்சயம் உருவாகும்” என்று கூறினார்.
இந்தியா மற்றும் அமெரிக்கா இடையே இடைக்கால இருதரப்பு வர்த்தக ஒப்பந்தம் தொடர்பான பேச்சுவார்த்தைகள் அண்மையில் புதுடெல்லியில் நடைபெற்றன. இரு நாடுகளும் பரஸ்பர நன்மை பயக்கும் ஒப்பந்தத்தை விரைவில் நிறைவு செய்ய உறுதிபூண்டுள்ளதாக தெரிவிக்கப்பட்டுள்ளது.
அமெரிக்க வர்த்தகக் குழுவின் இந்தியப் பயணத்தைத் தொடர்ந்து நடைபெற்ற பேச்சுவார்த்தைகள் ஆக்கபூர்வமாகவும் சாதகமாகவும் அமைந்ததாக இந்திய அதிகாரிகள் தெரிவித்துள்ளனர். மேலும், ஒப்பந்தத்தின் முதல் கட்டம் ஜூலை மாத நடுப்பகுதிக்குள் இறுதி செய்யப்படலாம் என்றும் எதிர்பார்க்கப்படுகிறது.
இந்தியா – அமெரிக்கா வர்த்தக உறவுகளை மேலும் வலுப்படுத்தும் வகையில் இந்த ஒப்பந்தம் அமையும் என்றும், இரு நாடுகளின் பொருளாதார ஒத்துழைப்பில் புதிய அத்தியாயத்தைத் தொடங்கும் என்றும் அரசியல் மற்றும் பொருளாதார வட்டாரங்கள் கருதுகின்றன.
