சபாக் பெர்ணாம், 04 ஜூன் 2026 : சிலாங்கூர் மாநிலத்தின் கல்வி வளர்ச்சிக்கு மேலும் வலுசேர்க்கும் வகையில், சபாக் பெர்ணாம் மாவட்டக் கல்வி அலுவலகத்தின் (Pejabat Pendidikan Daerah – PPD) புதிய கட்டிடத்தை சிலாங்கூர் இளவரசர் துலி யாங் தெராமாட் முலியா ராஜா மூடா தெங்கு அமீர் ஷா இப்னி சுல்தான் ஷராபுடின் இட்ரிஸ் ஷா அல்-ஹாஜ் அவர்கள் இன்று அதிகாரப்பூர்வமாகத் திறந்து வைத்தார்.
மக்களை நேரில் சந்தித்து அவர்களுடன் கலந்துரையாடிய பின்னர் நடைபெற்ற இந்த விழாவில், கல்வித் துறையின் வளர்ச்சிக்கு இளவரசர் தொடர்ந்து வழங்கி வரும் முக்கியத்துவம் மீண்டும் வெளிப்பட்டதாகக் கூறப்பட்டது.
தரமான வசதிகளையும், சிறந்த பணிச்சூழலையும் உருவாக்குவதன் மூலம் கல்வி அமைப்பை மேலும் வலுப்படுத்த வேண்டும் என்ற அவரது அர்ப்பணிப்பின் வெளிப்பாடாக இந்த புதிய மாவட்டக் கல்வி அலுவலகக் கட்டிடம் அமைந்துள்ளதாக அதிகாரிகள் தெரிவித்தனர்.
இந்த வளாகம், கல்வி பணியாளர்களின் நலனையும் பணித் திறனையும் மேம்படுத்துவதோடு மட்டுமல்லாமல், மாணவர்கள் மற்றும் உள்ளூர் சமூகத்திற்கான கல்விச் சேவைகளை மேலும் விரைவாகவும் திறம்படவும் வழங்க உதவும் என எதிர்பார்க்கப்படுகிறது.
இந்த புதிய கல்வி வளாகத்தின் கட்டுமானம், மலேசிய கல்வி அமைச்சும் (KPM), பொதுப்பணித் துறையும் (JKR) இணைந்து முன்னெடுத்த முயற்சியின் விளைவாக உருவாகியுள்ளது. நவீன வசதிகளுடன் கூடிய இந்த அலுவலகம், சபாக் பெர்ணாம் மாவட்டக் கல்வி அலுவலக ஊழியர்களுக்கு சிறந்த பணிச்சூழலை வழங்கும் என்றும் தெரிவிக்கப்பட்டுள்ளது.
நிகழ்வில் கல்வி அமைச்சின் திட்டமிடல் மற்றும் மேம்பாட்டுப் பிரிவின் துணை தலைமைச் செயலாளர் டத்தோ டாக்டர் மெகாட் சானி பின் மெகாட் அகமது சுபியான், மேம்பாட்டுப் பிரிவு செயலாளர் முகமது ரட்சுவான் பின் அப்துல் மானாப், சிலாங்கூர் மாநில கல்வி இயக்குநர் டத்தின் வான் நூர் அஷிகின் பிந்தி அபு காசிம், சபாக் பெர்ணாம் மாவட்டப் பள்ளிகளின் தலைமை ஆசிரியர்கள், பொதுப்பணித் துறை அதிகாரிகள் மற்றும் உள்ளூர் சமூக பிரதிநிதிகள் பலரும் கலந்து கொண்டனர்.
கல்வி உள்கட்டமைப்பை தொடர்ந்து மேம்படுத்தி, எதிர்கால தலைமுறைக்கு சிறந்த கல்விச் சூழலை உருவாக்குவது அரசாங்கத்தின் முக்கிய நோக்கங்களில் ஒன்றாகும் என்று நிகழ்வில் வலியுறுத்தப்பட்டது.
